Hmư̆ tui tơlơi jak iâo mơ̆ng Khua mir sir dêh čar Hàn Quốc Lee Jae Myung, ơi Tô Lâm Khua git gai Ping gah dêh čar ta hăng Bơnai ñu hrŏm hăng grŭp khua pơ ala gưl dlông dêh čar ta čuă gưl Kơnuk kơna pơ̆ dêh čar Hàn Quốc mơ̆ng lơ 10-13/8, mơguah lơ 11/8 yap tui mông ƀơi anih nao čuă pơ̆ Anom mă bruă Khua mir sir, Khua mir sir ơi Lee Lae Myung git gai mông ngă lơphet yôm phăn čơkă Khua git gai Ping gah dêh čar ta ơi Tô Lâm tui phiăn dlông hloh.

Tơdơi kơ ngă lơphet čơkă sit nik 2 gơñu ba jơlan hlâo khua pơ ala gưl dlông dua bôh dêh čar pơphun bơkơtuai pioh ba tơbiă hơdôm jơlan pơsir yôm phăn pioh djă pioh hăng pơđĭ kyar hloh tơlơi ro nao rai Gim hrŏm abih bang Việt Nam hăng Hàn Quốc pơ̆ anăp anai. Pơhiăp amăng mông bơkơtuai, Khua git gai Ping gah dêh čar ta ơi Tô Lâm pơtŏng sit: Mơ-ak biă hăng tơpă pran jua bơni kơ Khua mir sir hmâo pioh laih tơlơi đing nao hlâo jak iâo Khua git gai Ping gah dêh čar lĕ tuai blung a tơdơi kơ Hàn Quốc hmâo gong gai phrâo, pơdah tơlơi lăng yôm hăng đing nao dlông hloh mơ̆ng Hàn Quốc hăng drơi pô Khua git gai pioh kơ tơlơi rô nao rai hăng kơplah wah dua bôh dêh čar. Khua mir sir dêh čar Hàn Quốc Lee Jae Myung pơtŏng sit, gah yŭ tơlơi git gai kơjăp mơ̆ng Khua git gai Ping gah dêh čar ta ơi Tô Lâm, Việt Nam ră anai glăk hmâo tơlơi pơđĭ kyar bơwih ƀong tañ hloh, Khua mir sir dêh čar Hàn Quốc đăo kơnang lĕ pơgi kơdih anai Việt Nam amra jing dêh čar pơđĭ kyar hăng rơnoh prăk pơhrui glăi lu./.