Khua git gai Ping gah dêh čar lăi rơđah Việt Nam hlâo dơi jing ha sa lăng yôm tơlơi rô nao rai giăng mah mơ̆ng hlâo hăng Belarus; čang rơmang kơtưn gum hrŏm kơplah wah dua bôh dêh čar amăng abih bang hơdôm bruă, bôh tŭ yua hrŏm mơ̆ng dua bôh dêh čar, yua kơ tơlơi rơnuk rơnua, gum hrŏm hăng pơđĭ kyar ƀơi kual hăng ƀơi rŏng lŏn tơnah.

Pơ̆ anăp anai kiăng djru hơkrŭ đĭ hăng pơđĭ kyar hloh dong tơlơi rô nao rai giăng mah mơ̆ng hlâo Việt Nam - Belarus, Khua git gai Ping gah dêh čar ta ơi Tô Lâm čang rơmang hăng rơkâo pơphun dong hơdôm bruă bơkơtuai lu mơta, dơlăm hloh, ngă pơhưč lu hloh tơlơi gum hrŏm mơ̆ng hơdôm gưl mơnuih ƀôn sang, ƀing kơsem min bôh thâo phrâo, anom bơwih ƀong hăng biă ñu lĕ rơnuk hlăk ai, djru hlăk ai dua bôh dêh čar jai hrơi thâo hluh hăng jê̆ giăm hloh, pioh kơjăp tui pran jua giăng mah kơplah wah mơnuih ƀôn sang dua bôh dêh čar Việt Nam - Belarus jai hrơi jai kơjăp phik./.