Khua git gai Ping gah dêh čar pơtŏng sit dêh čar Mi lĕ bơnah gum hrŏm bơwih ƀong hăng tuh pơplai ba jơlan hlâo mơ̆ng Việt Nam, čih djă pioh hơdôm pơđĭ kyar tañ, abih bang mơ̆ng tơlơi rô nao rai Việt Nam – Mi amăng 30 thun rơgao yap mơ̆ng hrơi ngă mơ-ak tơlơi rô nao rai, amăng anun gum hrŏm bơwih ƀong, sĭ mơdrô hăng tuh pơplai jing phun mơ̆ng tơlơi rô nao rai dua bơnah.

Khua git gai Ping gah čang rơmang ƀing tuh pơplai dêh čar tač rơngiao, amăng anun hmâo ƀing tuh pơplai mơ̆ng dêh čar Mi kơtưn đĭ dong tuh pơplai ƀơi Việt Nam, biă ñu amăng hơdôm bruă pơplih mrô, pơplih mơtah, apui yua pơkra glăi, apui yua hơdjă, bŏng glăi hăng pơplih ayuh hyiăng. Khua git gai Ping gah dêh čar ta ơi Tô Lâm ăt rơkâo mơn hơdôm bôh anom bơwih ƀong dêh čar Mi, amăng anun hmâo Keh prăk KKR gum hơgôp klă dong amăng bruă pơtrut gum hrŏm dua bơnah, biă ñu amăng bruă bơwih ƀong, kơsem min hăng hơdră phrâo măi mok kơplah wah dua bôh dêh čar./.