Amăng tơlơi tơhmit, ol pran jua, Khua git gai Ping gah dêh čar ơi Tô Lâm hmâo tuĭ laih ñan, pơpŭ hơdor kơ Khua mir sir Hồ Chí Minh – Khua kiăng khăp mơ̆ng djuai ania Việt Nam. Khua git gai Ping gah dêh čar ơi Tô Lâm ol kơdol pran jua čih glông bôh hră hơdor glăi: “Rai pơ̆ anai, ƀing ta jai thâo hluh hloh yua kơ Khua mir sir Hồ Chí Minh ƀu kơnong kơ tơlơi ư-ang mơ̆ng djuai ania Việt Nam ôh mơ̆, dô̆ đơ đam rŏng lŏn tơnah pơpŭ bơni. Rai pơ̆ anai, ƀing ta kah hăng dưi glăi pơ̆ sang pô, lăng juăt, bă kơ pran jua kiăng khăp hăng ƀuh Wa ăt dô̆ ƀơi anai mơn”.

Ră ruai hăng mơnuih apăn bruă, mơnuih mă bruă ƀơi Kual djă pioh gru grua, Khua git gai Ping gah dêh čar ta pơdah pran jua, dưi rai čuă anih anom Wa dô̆ hăng mă bruă lơm dô̆ hơdip mưn ƀuh juăt biă, pơđao, djop mơta gơnam Wa yua lăng juăt hăng ƀu yôm mơn, pơdah đĭ gru rup khua git gai prong prin. Pơsit yôm mơnuih apăn bruă, mơnuih mă bruă amăng Kual gru grua hmâo bruă gơgrong biă pơgang hăng ngă tui hơdôm nua yôm ƀơi Kual djă pioh gru grua djru lu mơnuih mơ̆ng tač rơngiao hăng amăng lŏn ia rai čuă lăng hmâo na nao pran mưn ƀuh Wa Hồ ăt dô̆ ƀơi anai hăng ƀing ta mơn./.