Tlam lơ 13/12 ƀơi Ƀirô Ping gah, KHua git gai Ping gah dêh čar ơi Nguyễn Phú Trọng hơmâo mông tŭ jum Khua mua mơng anom pơtô bruă Ping gah mơnuih ƀon sang ngă hơkrŭ Lao yua ơi Khăm-phăn Phởi-nhạ-vông, Khua apăn bruă Ping gah, Khua anom pơtô bruă Ping gah, Khua Khul Lý luận dêh čar ba jơlan hlâo, glăk nao čuă, mă bruă ƀơi Việt Nam. Đĭ pơhiăp amăng mông bưp, Khua git gai Ping gah dêh čar pơsit tong lăng tơlơi gơgrong mơng Ping gah, Kơnuk kơna, mơnuih ƀon sang Việt Nam kơ tơlơi rô nao rai giang mah, ñu lĕ khua mua hăng gơyut gơyâo rah, lêng kơ jê̆ giăm amăng hơdôm tal ngă hơkrŭ  đưm hlâo adih kah hăng amăng rơnuk pơjing hăng wai pơgang lŏn ia ră anai.

Khua git gai Ping gah lăng yôm hơdôm boh than ngă hrŏm kơplah wah dua anom pơtô bruă Ping gah kah hăng hơdôm boh than mơng jơnum bơkơtuai, hơmâo pơgôp yôm phăn ngă hơkrŭ glăi hăng kơtưn kjăp tơlơi rô nao rai Việt Nam - Lao, laih dong rơkâo pơ anăp anai, dua bơnah kiăng tŏ ngă tui gru grua mơng dua bơnah, ngă tui tơlơi dưi mơng bruă jao kơđi čar, gum hrŏm kjăp phik, pok pơhai tŭ yua tơlơi pơkôl mơng khua mua pơprong mơng dua Ping gah, dua kơnuk kơna hăng tơlơi pơkôl ngă hrŏm kơplah wah dua anom pơtô bruă Ping gah dêh čar.