Amăng mông tŭ jum, ơi Nguyễn Trọng Nghĩa ăt lăi pơthâo glăi mơn hăng Khua git gai Ping gah, Khua mir sir Thongloun Sisoulith kơ bôh tơhnal mơng Bruă Bơkơtuai pơblang tal 9 kơplah wah dua Ping gah, pơsit bruă bơkơtuai pơblang tal 9 hmâo tơhnal pơblang prong, djơ̆ hăng tơlơi kiăng yua mơng rim Ping gah, hơdôm bôh yôm lăi pơthâo nao rai pơdah pran pơsit, bôh yôm dơlăm hăng dưi ba tơbiă lu jơlan gah pơsir sit nik; pơtŏng sit hơdôm ƀirô kơsem min tơlơi pơblang mơng dua Ping gah amra gum hrom kơjăp dong, kơtưn lăi pơhing nao rai tơlơi pơblang, lăi pơthâo tơlơi găn rơgao kiăng gum hrom ngă truh kih Tơlơi pơtrun pơsit Jơnum mơng rim Ping gah.

Khua git gai Ping gah, Khua mir sir Thongloun Sisouluth bơni bôh tơhnal bơkơtuai hăng čang rơmang pơ̆ anăp anai dua bơnah gum hrom kơjăp dong, kơtưn lăi pơthâo tơlơi pơhing, lăi pơthâo nao rai hơdôm akô̆ bruă hăng tơlơi kơsem min pơblang, tơlơi pơmin hăng lăi pơhing hyu djru pơkă bruă khom ngă, hơdră bruă pơđĭ kyar ăt kah hăng lăi pơthâo nao rai tơlơi găn rơgao lom pơdŏng kơnuk kơna djop mơnuih dưm kơnar ƀơi rim bôh dêh čar./.