Amăng mông tŭ jum, Khua git gai Ping gah, Khua mir sir dêh čar ta ơi Tô Lâm lăi rơđah, ră anai, Việt Nam jing sa amăng 40 bôh dêh čar bơwih ƀong prong hloh rŏng lŏn tơnah, dŏng amăng grŭp 20 bôh dêh čar bơwih ƀong hmâo hơdră sĭ mơdrô ba jơlan hlâo rŏng lŏn tơnah, dŏng tal 32 amăng top 100 bôh dêh čar hmâo anăn păn gơnam sĭ mơdrô kơtang hloh rŏng lŏn tơnah.

Khua git gai Ping gah, Khua mir sir dêh čar ta ơi Tô Lâm lăi rơđah, pơ̆ anăp anai, Việt Nam đing nao ngă tui pran kơtang mơ̆ng pô, gơgrong hlâo mut hrŏm jar kơmar anăp nao pơplih bơwih ƀong mrô, đĭ kyar mơtah, pơđĭ kyar bôh thâo phrâo hơdră mă yua măi mok, pơplih phrâo pơčeh phrâo pioh mut hrŏm dơlăm prong, gum hrŏm ba glăi bôh tơhnal hloh amăng bruă pơlir hơbit rŏng lŏn tơnah. Hrŏm hăng anun, pơtrut kơtang tuh pơplai pơđĭ kyar anom mă yua kơ bruă, hơdôm rơwang bruă yôm phăn, pơtrut kơtang lơm dăp glăi, pơđĭ dlông bôh thâo amăng lŏn ia, tơhnal gơgrong pô mơ̆ng bruă bơwih ƀong, pơplih phrâo dong, pơjing anih anom tuh pơplai bơwih ƀong sĭ mơdrô gêh gal hloh kơ hơdôm bôh anom bơwih ƀong./.