Mơguah lơ 22/9 yap tui mông ƀơi dêh čar Mi, Jơnum gưl dlông Pơgi kơdi anai hmâo pok phun yôm phăn ƀơi Ƀirô mă bruă Sang gum hơbit djop dêh čar ƀơi New York, dêh čar Mi hăng tơlơi nao pơhmư̆ mơ̆ng lu khua mua gưl dlông hơdôm bôh dêh čar, hơdôm khul grŭp jar kơmar hăng amăng kual, hrŏm hăng khua pơ ala hơdôm khul grŭp mơnuih ƀôn sang, ƀing kơsem min bôh thâo phrâo, prăk kak hăng anom bơwih ƀong. Khua git gai Ping gah, Khua mir sir dêh čar ta ơi Tô Lâm ba jơlan hlâo grŭp khua pơ ala gưl dlông dêh čar ta nao pơhmư̆ mông Jơnum.

Pơhiăp amăng mông jơnum, Khua git gai Ping gah, Khua mir sir dêh čar ta ơi Tô Lâm brơi thâo; Việt Nam bơni hơdôm hră pơ-ar dưi pel ĕp amăng mông Jơnum hăng čang rơmang hơdôm bôh yôm hră pơ-ar amra dưi pok pơhai khut khăt, ba glăi bôh tơhnal. Việt Nam čang rơmang Sang gum hơbit djop dêh čar hăng bruă mă phun, git gai hăng hơdôm khul grŭp jar kơmar hmâo dong hơdôm tơlơi gum hơgôp sit nik hloh, ba glăi bôh tơhnal hloh, kơtang tit hloh amăng tơhnal ba tơbiă pơgăn pơhlôm hlâo tơlơi truh hăng tơlơi pơđĭ kyar tañ, kơjăp kơtang mơ̆ng rong lŏn tơnah dong mơ̆ng hrơi anai mơtăm. Việt Nam pơkôl amra gum hơgôp klă, ba glăi bôh tơhnal amăng hơdôm tơlơi gir run hrŏm pioh pơdŏng rŏng lŏn tơnah rơnuk rơnua, pơđĭ kyar dưm kơnar yua kơ tơlơi hơdip mơda trơi pơđao, yâo mơ-ak mơ̆ng ană mơnuih./.