Khua git gai pơ ala mơnuih ƀôn sang dêh čar Mông Cổ Amarbayasgalan hok mơ-ak hăng tal nao čuă gưl Kơnuk kơna pơ dêh čar Mông Cổ mơng Khua git gai Ping gah, Khua mir sir ơi Tô Lâm; đăo gơnang tal nao čuă anai amra pơgôp kơtưn ngă hrŏm hăng ngă dơlăm ƀiă dong tơlơi rô nao rai “Ngă hrŏm djop mơta Việt Nam-Mông Cổ”, pơsit tong anai amra jing atur kiăng pơtrut pơđĭ kyar djop mơta bruă ngă hrŏm kơplah wah dua boh dêh čar pơ anăp anai. Dua bơnah lăng yôm tơlơi ngă hrŏm, pơbưp nao rai kơplah wah Khua pơ ala mơnuih ƀôn sang dêh čar dua bơnah glăk pơđĭ kyar tañ hăng jai hrơi sit nik.

Dua bơnah tŏ tui tŏ tui pok pơhai tŭ yua, djop mơta hơdôm boh tơhnal amăng tơlơi pơkôl ngă hrŏm hơmâo kĭ kơplah wah dua Ƀirô Khua pơ ala mơnuih ƀôn sang dua boh dêh čar thun 2018; tŭ ư kơtưn tơlơi gơgrong mơng anom bruă čih pơkra tơlơi phiăn dua bơnah amăng bruă gum hrŏm djru pơtrut tơlơi rô nao rai dua boh dêh čar pơđĭ kyar bơwih ƀong huă sit nik, ba glăi tŭ yua hăng djop mơta, lăp djơ̆ hăng tơlơi rô nao rai ngă hrŏm djop mơta; gir run pơtrut pơphun hăng pơtrut pơsur hơdôm anom bơwih ƀong sĭ mơdrô dua bơnah mut hrŏm hơdôm jơlan hơdră pơsur sĭ mơdrô.