Tơdơi kơ khua mua phun akha hăng ding kơna Khul git gai Ping gah pơčrông sai, Khua git gai Ping gah, Khua mir sir ơi Tô Lâm hơmâo pơsit tong glăi sa, dua bruă jao mơ̆ Ping gah hăng djop anih anom kơđi čar kiăng đing nao pơsir hĭ pơ anăp anun lĕ: Đing nao pel ĕp kơ bruă dŏ glăi mơng anai truh abih thun 2024 hăng ba tơbiă hơdôm hơdră bruă kiăng tañ ngă pơgiong, ba glăi tŭ yua; tŏ tui prap lui kiăng pơhlôm brơi klă hloh Jơnum lok 10 Khul apăn bruă Ping gah tal XIII; djop khul grup prap lui Jơnum Ping gah tal XIV kiăng pok pơhai bruă mă djơ̆ hrơi mông pơkă.

Hăng bruă jao pơđĭ kyar bơwih ƀong huă-mơnuih mơnam, kiăng đing nao pơsir hĭ tơnap tap, gun găn, hơdôm bruă aka ƀu klă ngă gêh gal brơi anom bơwih ƀong sĭ mơdrô, ƀing bơwih ƀong  dưi pơđĭ kyar, gêh gal tuh pơ alin, bơwih ƀong sĭ mơdrô, pơtrut bruă bơwih ƀong ba glăi tŭ yua, ngă mơnuih ƀôn sang hur har amăng bơwih ƀong huă, sĭ mơdrô hăng tơlơi hơdip mơda. Jơnum ăt pơčrông sai, pơgôp hiăp hăng hơmâo jơlan gah pơsir hĭ hơdôm bruă yôm pơkŏn dong amăng lŏn ia pơ anăp anai.