Jao hră pơsit hăng pơtă pơtăn kơ bruă mă abih bang khua anih jưh pơ ala, ơi Tô Lâm Khua git gai ping gah, Khua mir sir lăi pơtong, ƀing khua mua pơ ala dưi jao bruă tal anai lêng kơ mơnuih ngă bruă pơtom hiăp thâo rơgơi, kơhnâo kơhnăk, hơmâo lu thun găn rơgao amăng bruă mă pơtom hiăp.

Mah amăng thun blan tơlơi pơhing ƀơi rŏng lŏn tơnah, amăng kual dŏ lu tơlơi rung răng ƀu mơak klă, ƀu gêh găl ôh samơ̆ abih bang ƀing khua mua pơ ala dêh čar lêng kơ lăi, hrơi mông gêh găl lĕ jing hrơi mông dêh čar hlăk yak nao amăng rơnuk phrâo hrưn đĭ, rơnuk hrưn đĭ mơ̆ng djuai ania; lơ̆m tŭ mă bruă jao phrâo amăng pran jua đăo kơnang hăng h’ĭn pran jua yua lŏn ia pơđĭ kyar, lăi pơtong amra tong ten hăng tơhnal pơtrun mơ̆ng dêh čar, djuai ania yơh hlâo hloh, lir hơbit klâo tơmeh phun kơ bruă pơtom hiăp Ping gah, Kơnuk kơna hăng mơnuih ƀôn sang; lir hơbit hăng bruă mă pơgang lŏn ia, hơđong dêh čar; akŏ pơdong anom bruă khua pơ ala kơtang, khin hơtai, kiăng rim čô mơnuih apăn bruă, boh nik ñu khua pơ ala lĕ ngă mơnuih pơtom hiăp pơ ala brơi lăp kơ djuai ania, Ping gah, Kơnuk kơna, mơnuih ƀôn sang Việt Nam.