Lơ 8/4, ƀơi Ƀirô khua mir sir, pơphun jơnum lăi pơthâo hră pơsit mơng Ding jum kơđi čar rơkâo Khul apăn bruă, Khul gum bruă, Khul git gai, kơ-iăng Khua git gai Ping gah Kơnuk kơna hăng lăi pơthâo hơdôm hră pơsit ruah ding kơna Kơnuk kơna rơwang thun 2026-2031. Khua git gai Ping gah, Khua mir sir ơi Tô Lâm hơmâo jao hră pơsit brơi Khua git gai Ping gah Kơnuk kơna, Khua dêh čar ơi Lê Minh Hưng hrŏm hăng ƀing khua djru bruă; laih dong jao hră pơsit ruah Kơ-iăng Khua dêh čar ơi Phạm Gia Túc, Khua tơhan Đại tướng Phan Văn Giang ngă kơ-iăng Khua dêh čar, Khua ding jum ling tơhan, hrŏm hăng ƀing kơ-iăng Khua dêh čar, Khua ding jum, khua anom bruă bơkơnar ding jum.

Đĭ pơhiăp amăng mông jơnum, Khua git gai Ping gah, Khua mir sir ơi Tô Lâm lăi rơđah bruă jao amăng rơwang phrâo ƀu djơ̆ kơnong lĕ tơlơi tŏ tui đôč ôh mơ̆ ăt jing tơlơi yak đĭ rơwang pơđĭ kyar prong ƀiă, boh than ba glăi tuč rơnuč kiăng pơdah amăng tơlơi hơdip klă tui mơng mơnuih ƀôn sang hăng kơdrưh ang, tơlơi đăo gơnang mơng lŏn ia. Khua git gai Ping gah, Khua mir sir lăi pơtong bruă jao phun mơng Kơnuk kơna rơwang phrâo lĕ ngă gêh gal brơi pơđĭ kyar, pok rai anih pơđĭ kyar, tơlơi pơtrut pơđĭ kyar phrâo hăng hrưn đĭ bruă pơphun ngă tui kiăng dưi ngă djơ̆ hơnong pơkă ba tơbiă.