Tui tơlơi pơhing mơng gơnong bruă ngă hmua hăng ayuh hyiăng tơring čar Lâm Đồng brơi ƀuh, mơng akŏ thun truh ră anai nua kmơk, ia jrao pơgang phun pla đĭ giăm 10%, kơnong kmơk đĭ giăm 17%. Tui đăo lăng hlâo mơng anai truh rơnuč thun, prăk tuh pơ alin amăng bruă ngă hmua amra đĭ mơng 3-5%, đa hơmâo gơnam đĭ truh 10%. Mah nua blơi gơnam yua đĭ, bruă ngă hmua, đang glai, akan hơdang ƀơi Lâm Đồng ăt tŏ tui pơđĭ kyar hơđog, truh 5,39% amăng rơwang tal 1 thun anai.

Gơnong bruă ngă hmua hăng ayuh hyiăng amra tŏ tui pok pơhai hơdôm hơdră lăp djơ̆ kiăng djru brơi mơnuih ngă hmua. Amăng anun đing nao ngă hơđong rơnoh tuh pơ alin bơwih ƀong, gơgrong pok pơhai hơdôm hơdră pơkrem, wai lăng kjăp gơnam yua gah ngă hmua hăng črâo brơi mơnuih ƀôn sang pơplih pơkra amăng bruă bơwih ƀong, pơkra pơjing brơi lăp djơ̆.