Čih pioh bruă hơmâo ƀơi phường Bồng Sơn, tơring čar Gia Lai sa amăng hơdôm plơi pla pok pơhai ngă tui tañ hloh ƀơi anih pơdong plơi phrâo bơwih brơi kơ bruă čuk pơkra jơlan rơdêh đuăi hmar ƀơi kơdư čư̆ dlông, tui jơlan mơ̆ng kual Kơdư nao pơ Dơnung dêh čar, brơi ƀuh bruă ngă tŭ ư sa amăng plĕ mơ̆ng gong gai kơnuk kơna hăng tơlơi bơtŭ ư hrŏm hăng mơak klă mơ̆ng mơnuih ƀôn sang. Tơdơi kơ hơmâo pơtô lăi, jak iâu kơ jơlan hơdră brơi duh glăi lŏn sang đang hmua, lu sang anŏ mơnuih ƀôn sang kual plơi pla ƀut Thiết Đính Nam hơmâo prăp lui ngă hrŏm, amra jao glăi lŏn pioh čuk pơkra jơlan. Sang anŏ yă Trần Thị Thu sa amăng hơdôm boh sang anŏ tañ jao glăi lŏn đang rơbêh 1000 met karê đang hmua laih anun mơak mơn hăng hơdră kơnuk kơna duh glăi.

“Tơ tă anai, Kơnuk kơna mă glăi lŏn pioh yua kơ bruă pơkŏn, ăt gêh găl brơi kơ mơnuih ƀôn sang ta mơ̆n, anun  ngă hơgĕt lĕ mơ̆ng gleh, tŭ ư jao glăi baih lah, djop pô mơak soh mơ̆n”.

Tơlơi bơtŭ ư anun, ƀu djơ̆ lăi tŭ kơ hơmâo ôh, yua hơmâo mơ̆ng bruă mă djơ̆ hơdră, lăp hăng bruă hơmâo sit nik gong gai kơnuk kơna pok pơhai. Mơ̆ng bruă jơnum plơi pla, pơtô lăi, pok pơblang brơi thâo hluh jơlan hơdră kơnuk kơna…abih bang dưi ngă tui sa amăng plĕ, tơpă ară. Ơi Lê Văn Phúc, Khua ƀut plơi Thiết Đính Nam, phường Bồng Sơn brơi thâo, lơ̆m mơnuih ƀôn sang thâo hluh rơđah laih jơlan hơdră kơnuk kơna pơtrun, pok pơhai ngă tui bruă ngă anai gêh găl hloh:

“Phường đing nao biă mă, ƀut plơi pla pơphun ngă tui hyu pơtôm lăi, dăp hơdră jơnum plơi, kiăng hmư̆ mơnuih ƀôn sang lăi pơthâo anŏ kiăng. Mơnuih ƀôn sang tŭ ư soh amăng bruă pơdong glăi plơi phrâo bơwih brơi, čuk pơkra jơlan rơdêh treng đuăi hmar Kơdư-Dơnung. Abih bang djop sang anŏ djơ̆ anăn khom brơi đuăi, pơklaih ala lŏn, jao glăi kơ bruă čuk pơkra jơlan, tŭ mă prăk duh djop, ƀuh rơđah mơnuih ƀôn sang mơak hrŏm tŭ ư soh”.

Hăng pran jua bơtŭ ư hrŏm bang bơngač amăng phường hlong truh pơ phường Hoài Nhơn Bắc-anih hơmâo hơdôm rơtuh boh sang anŏ mơnuih ƀôn sang bơbeč yua mơ̆ng kơčăo bruă anai. Sang anŏ ayong Nguyễn Văn Phán, ƀut plơi Hy Văn hơmâo jao glăi dua hlô̆ hmua pơdai ia đơ đam 1.500 met karê, ăt tŭ ư hăng jơlan hơdră kơnuk kơna pơtrun:

“Sang anŏ gơmơi ăt kah hăng sang anŏ mơnuih ƀôn sang amăng ƀut plơi Hy Văn mơ̆n, tŭ ư soh hăng jơlan hơdră mơ̆ng kơnuk kơna pioh čuk pơkra jơlan nao rai, pơkă glăi kual anai. Mơnuih ƀôn sang pơ anai hơ̆k mơak biă mă jơlan hơdră kơnuk kơna pơtrun lĕ pơđĭ kyar tơlơi bơwih ƀong huă mơnuih mơnam amăng kual, yua kơ anun tŭ ư soh”.

Kiăng dưi hơmâo tơlơi bơtŭ ư anun, djop gưl anom bruă gong gai kơnuk kơna ƀơi tơring čar Gia Lai hơmâo pok pơhai lu hơdră ngă tui sa hnơ̆ng, mơ̆ng akŏ bruă lŏn mơnai truh pơ bruă jŭ yap glăi, duh prăk lŏn sang đang hmua mơnuih ƀôn sang. Ơi Trần Minh Lâm-Kơ-iăng khua jơnum min mơnuih ƀôn sang phường Hoài Nhơn Bắc brơi thâo, bruă mă pơtô lăi ăt jing sa bruă mă dưi pơtong rơđah lĕ bruă ngă re se na nap, truh kơ ngă giong bruă duh glăi, čuk jơlan giong.

“Ƀing gơmơi ăt pơtô lăi brơi mơnuih ƀôn sang thâo hluh rơđah kơ ring bruă phun mơ̆ng dêh čar pioh ngă gêh găl kơ mơnuih ƀôn sang thâo hluh rơđah bruă pơkă  hnơ̆ng ngă jơlan rơdêh treng đuăi hmar. Bruă phun ñu hyu pơtô lăi mơnuih ƀôn sang brơi tŭ ư hrŏm amăng bruă duh glăi lŏn sang đang hmua mơnuih ƀôn sang kiăng gêh găl hloh hăng tañ jao glăi kơčăo bruă čuk pơkra jơlan”.

Amăng đơ đam tơring čar Gia Lai, Kơčăo bruă čuk pơkra jơlan rơdêh treng đuăi hmar mơ̆ng Kơdư-Dơnung găn rơgao  ƀơi 18 boh să, phường, tek djơ̆ lŏn sang đang hmua duh glăi kơ 4.000 boh sang anŏ, hăng rơnoh prăk khom duh glăi lĕ 6.800 klai prăk. Truh ră anai, tơring čar Gia Lai ngă giong laih 38 anih pơdong glăi plơi phrâo, djop brơi kơ anih dŏ plơi pla hơđong kơ mơnuih ƀôn sang tek djơ̆. Tui hăng ơi Nguyễn Tự Công Hoàng, Kơ-iăng khua Jơnum min mơnuih ƀôn sang tơring čar Gia Lai, kiăng dưi pơhlom ngă djơ̆ bruă jao, tơring čar hơmâo jơnum rim sa rơwư̆ pơkă kiăng sem glăi bruă mă, laih dơ̆ng prăp lui prăk kăk, mơnuih mă bruă, kiăng hmao kru tla prăk duh glăi kơ mơnuih ƀôn sang.

“Pơ anăp anai, djop plơi pla kiăng ngă tui kơtang hloh, khut khăt hmar ƀiă dơ̆ng. Pơtong rơđah đing nao kơ bruă hơgĕt ngă hlâo, pơklaih ala lŏn pioh čuk pơdăo, jao glăi kơ anom bruă pơkra jơlan rơdêh treng mă bruă. Pơtrun hiăp kơ gong gai plơi pla, să anăm sem lăng abih bang giong kah mơ̆ng tla prăk, pơkă nua, khom jŭ yap dơ̆ pă pơkă nua duh glăi mơtam hmao kru, giong tla prăk kơ mơnuih ƀôn sang lĕ hlong jao glăi kơ anom bruă čuk pơkra laih anun mơnuih ƀôn sang tŭ mă djop prăk”.

Hăng tơlơi gum hrŏm sa amăng amăng plĕ abih bang glông bruă kơđi čar hăng sit biă mă ñu tơlơi tŭ ư mơ̆ng mơnuih ƀôn sang, bruă mă pơklaih ala lŏn, duh glăi kơ mơnuih ƀôn sang pioh čuk pơkra jơlan rơdêh treng đuăi hmar mơ̆ng Kơdư nao pơ dơnung ƀơi tơring čar Gia Lai hơmâo boh tŭ yua hiam klă. Anai lĕ anŏ gơgrong phun yom biă mă pioh kơ bruă čuk pơkra jơlan, kơčăo bruă mơ̆ng dêh čar dưi pok pơhai djơ̆ hơdră, pơjing pran kơtang pơtrut pơđĭ kyar phrâo amăng kual Dap Kơdư hăng amăng đơ đam dêh čar hnun mơ̆n.