Amăng hơdôm hrơi nao čuă gưl Kơnuk kơna pơ dêh čar Philippines, lơ 1/6, tơdơi kơ mông čơkă gưl kơnuk kơna ƀơi Ƀirô Malacanang, plơi prong jưh jom Manila, Khua mir sir ơi Tô Lâm pơphun jơnum bơkơtuai hăng Khua mir sir Philippines ơi Ferdinand Romualdez Marcos Jr. Amăng mông jơnum, dua čô khua hơmâo bơtŭ ư ba tơbiă tơlơi pơsit hrŏm hrưn đĭ tơlơi rô nao rai Việt Nam-Philippines jing bơnah ngă hrŏm yôm phăn hloh, pok rai rơnuk pơđĭ kyar phrâo brơi tơlơi ngă hrŏm dua bơnah. Hăng bruă hrưn đĭ amăng tơlơi rô nao rai ngă hrŏm yôm phăn hloh anai, dua bơnah bơtŭ ư gum hrŏm pơjing jơlan hơdră bruă mă pok pơhai glông rô nao rai phrâo pơ anăp anai.

Kơ hơdôm bruă amăng kual hăng jar kmar, dua čô khua pơsit tong tŏ tui kơtưn gum hrŏm kjăp phik, dong yua tơdruă amăng hơdôm mông jơnum djop bơnah, sit biă ñu lĕ sang gum hơbit djop dêh čar hăng kual ASEAN. Dua čô khua bơtŭ ư pơtrut djop Ding jum, gơnong bruă hăng gong gai ƀon lan dua bơnah gum hrŏm kjăp phik, pok pơhai tŭ yua hơdôm tơlơi pơkôl hơmâo kĭ kơplah wah dua čô khua mua, pơgôp ba tơlơi rô nao rai ngă hrŏm yôm phăn hloh kơplah wah Việt Nam-Philippines yak nao rơwang pơđĭ kyar phrâo.