Tơdơi kơ mông čơkă yôm yang hrơi dong lơ 7/10/2024 (tui mông ƀơi dêh čar Prang) pơ Ƀirô Elysee, Paris, Khua git gai Ping gah, Khua mir sir ơi Tô Lâm hơmâo jơnum bơkơtuai hăng Khua mir sir ơi Emmanuel Macron. Amăng mông jơnum bơkơtuai, dua čô khua hơmâo pơčrông sai djop mơta kơ tơlơi bơwih ƀong huă-mơnuih mơnam ƀơi rĭm boh dêh čar, tơlơi rô nao rai ngă hrŏm dua bơnah hăng hơdôm bruă amăng kual, jar kmar dua bơnah đing nao. Dua boh dêh čar tŭ ư kơtưn pơlăi nao rai djop gưl, sit biă ñu amăng Ping gah, Kơnuk kơna, Ƀirô Khua pơ ala mơnuih ƀôn sang dêh čar.

Dua čô khua tŭ ư hăng tơlơi lăi pơthâo hrưn đĭ tơlơi rô nao rai ngă hrŏm djop mơta hăng mut hrŏm amăng hơdôm jơlan gah, hơdră bruă pơprong kiăng ba hơdră ngă hrŏm yôm djop mơta Việt Nam-Prang jai hrơi dơlăm tui, sit nik, lăp djơ̆ hăng hơdră ngă hrŏm kơplah wah dua boh dêh čar amăng rơnuk phrâo. Hăng tơlơi pơsit anai, dêh čar Prang jing dêh čar blung a amăng kual EU hơmâo tơlơi rô nao rai ngă hrŏm djop mơta hăng Việt Nam.