Khua git gai Ping gah, khua mir sir ơi Tô Lâm lăi pơtong, jơnum anai lĕ sa tơlơi pơčeh yôm phăn biă mă amăng tơlơi rô nao rai ngă hrŏm yôm phăn djop mơta kơplah wah Việt Nam hăng Australia glăk pơđĭ kyar hiam klă, jai hrơi jai dơlăm tui, sit nik hăng tŭ yua, sit biă ñu amăng lu bruă amra pơsit brơi pran bơkơtưn hăng pơdrong sah mơng rĭm boh dêh čar amăng hơdôm hơpluh thun pơ anăp. Khua git gai Ping gah, khua mir sir brơi thâo, hăng dêh čar Việt Nam, pơđĭ kyar yua boh thâo phrâo, boh thâo măi mok, pơplih pơčeh phrâo hăng mơnuih mă bruă rơgơi ƀu djơ̆ kơnong lĕ sa tơlơi ruah đôč ôh mơ̆ ăt jing tơlơi rơkâo kiăng ngă tui tơlơi čang rơmang pơjing lŏn ia pơđĭ kyar, pơhrui lu ƀiă amăng thun 2045.

Yua anun, Ping gah, kơnuk kơna Việt Nam hơmâo pơsit hơbô̆ bruă pơđĭ kyar phrâo, amăng anun boh thâo ia rơgơi, boh thâo phrâo, pơplih pơčeh phrâo, pơplih mrô hăng mut hrŏm jar kmar hơmâo pơsit lĕ hơdôm bruă pơđĭ kyar phun amăng tơlơi bơwih ƀong huă.