Nao lăng mông pơdah rup hơmâo Khua git gai Ping gah, Khua mir sir ơi Tô Lâm, Khua dêh čar ơi Lê Minh Hưng, Khua git gai pơ ala mơnuih ƀôn sang dêh čar ơi Trần Thanh Mẫn, hrŏm hăng lu khua mua, khua apăn bruă Ping gah, Kơnuk kơna. Mông pơdah rup pơphun ƀơi 4 anih pơlăng nao rai hơmâo Sang pioh hơdor ƀing tơhan djai pơsăn drơi jăn ƀơi să Thanh Thủy (Tuyên Quang), Gong kut Bắc Sơn (Hà Nội), pơsat tơhan djai pơsăn drơi jăn dêh čar Jơlan mrô 9 (Quảng Trị) hăng đang bơnga Lê Thị Riêng (ƀôn prong Hồ Chí Minh). Jơlan hơdră kiăng pơdah jơlan hơdră pioh hơdor tơngia tơhan djai pơsăn drơi jăn hơmâo tuh drah pơčah asar yua kơ lŏn ia, laih dong pơpŭ ling tơhan glăk tơhrơi mlăm ngă tui bruă jao hyu ĕp, klơi pơƀut hăng ĕp brơi anăn krăn pô tơlang tơhan.

Boh tơhnal pơƀuh amăng mông pơdah rup “Pơtŭ pơčrang brơi jơlan glông” anai lĕ “Hơdră bruă 500 hrơi mlăm pơtrut kơtang ngă tui bruă hyu ĕp, klơi pơƀut hăng ĕp brơi anăn krăn pô tơlang tơhan”. Jơlan hơdră hơmâo pơjing tui pran jua khăp pap, pơlir sô hơđăp hăng tơlơi hơdip phrâo ră anai hăng tơlơi adôh suang, hơdôm gơnam sô hơđăp hăng sit biă ñu lĕ tơlơi bơră ruai tơpă sit, hơdôm mông pơbưp, pơtum jơngum tơdơi kơ hơdôm hơpluh thun pơdah ƀơi anih ngui. “Ƀing mơnuih aka ƀu rơngiă ôh”, “Tơlơi pơsit mơng hơtai boh-Hơdră bruă 500 hrơi mlăm” hăng “Ĕp brơi anăn ƀing tơlang tơleh tơhan” anai lĕ 3 jơlan hơdră pơdah rup “Pơtŭ pơčrang brơi glông jơlan” .