Hơdor glăi tal 79 thun Hrơi pioh kơ tơhan rơka rơkač-pơsăn drơi jăn yua kơ lŏn ia, kơnôl 26/7, ƀơi ƀôn prong Hồ Chí Minh, ơi Trần Thanh Mẫn, Khua pơ ala mơnuih ƀôn sang dêh čar nao tŭi ñăng, dưm guang bơnga ƀơi Gong kut hơdor glăi kơ Khua git gai ping gah hơđăp rơgom ơi Trần Phú, sang djă pioh pơnăng čih anăn, bruă ngă mơ̆ng ƀing tơhan khin hơtai djai pơsăn drơi yua kơ lŏn ia, sang djă pioh hơbâo, tơlang tơleh ƀing tơhan pơsăn drơi, anih h’ŭ kơ mơnuih khin hơtai djai drơi yua kơ lŏn ia rơgŏm Lê Thị Riêng hăng mơnuih khin hơtai djai drơi yua kơ lŏn ia Trần Văn Kiểu; laih dơ̆ng nao tơña bla, juh alum, pơtrut pran jua ƀing tơhan hlăk mă bruă hơduah ĕp tơlang hăng rŭ kual pơsat ƀing pơsăn drơi ƀơi đang bơnga mă anăn Lê Thị Riêng.

Mông jơnum kơdrưh ang hăng pơpŭ pơyom, ngă ol kơdol pran jua, ơi Trần Thanh Mẫn, Khua pơ ala mơnuih ƀôn sang dêh čar hăng grup khua mua nao čuh ñang ƀâo bơngui hăng dưm guang bơnga kiăng hơdor kơ Khua git gai ping gah rơgom ơi Trần Phú laih anun ƀing tơhan pơsăn drơi jăn yua kơ lŏn ia, yua kiăng mơnuih ƀôn sang hyuk hyak mơak klă kah hăng ră anai. Nao juh alum pơtrut pran jua amăng bruă mă, hyu hơduah, klơi ĕp tơlang tơleh tơhan djai pơsăn drơi jăn yua kơ lŏn ia kiăng pơčrang lăng thâo anăn krăn pô dor hrŏm amăng lan đang bơnga Lê Thị Riêng, Khua pơ ala mơnuih ƀôn sang ơi Trần Thanh Mẫn, khua gum bruă git gai ping gah ơi Trần Cẩm Tú hăng Khua Jơnum min mơnuih djop djuai ania mơnuih mơnam Việt Nam yă Bùi Thị Minh Hoài hơmâo jao gơnam pơyơr yom pơphăn kơ ƀing ling tơhan hlăk dŏ mă bruă ƀơi anai.