Kŭp akŏ hơ-ŭ hơdor tơhan djai pơsăn drơi, Khua git gai Ping gah, Khua mir sir ơi Tô Lâm hăng grup hyu mă bruă pơdah pran hơdor tơngia hăng hơdôm tơlơi gum pơgôp prong prin mơng tơhan djai pơsăn drơi hơmâo tuh rơyuh pran jua, sông kơtang, djai pơsăn drơi yua kơ tơlơi rơngai, ngă pô mơng lŏn ia ta.

Dưm guang bơnga pioh hơdor kơ Khua git gai Ping gah ơi Lê Duẩn ƀơi anih pioh hơdor ƀơi plơi Hậu Kiên, să Triệu Thành, tơring glông Triệu Phong, Khua git gai Ping gah, Khua mir sir ơi Tô Lâm hăng grup hyu mă bruă pơdah pran hơdor tơngia hăng pơpŭ bơni hơdôm tơlơi gum pơgôp prong prin mơng Khua git gai Ping gah ơi Lê Duẩn hăng bruă ngă hơkrŭ pơklaih rơngai lŏn ia ta.

Čih amăng hră pioh hơdor, Khua git gai Ping gah, Khua mir sir hơmâo čih tui anai: “Ha rơnuk hơdip hăng bruă mă mơng ơi Lê Duẩn hơmâo pơgôp amăng bruă pơklaih rơngai lŏn ia hăng pơjing dêh čar chủ nghĩa xã hội, pơđĭ kyar lŏn ia Việt Nam. Hơdôm tơlơi pơgôp prong prin mơng ơi Lê Duẩn ngă bơngač lŏn ia Việt Nam hăng djă pioh na nao amăng gru grua hing ang hăng sông kơtang mơng djuai ania”.