VOV4.Jarai - Hơdor glăi 75 thun Hrơi pioh kơ ling tơhan rơka ruă – pơsăn drơi, mơguah lơ 26/7, grŭp khua pơ ala Grŭp mă bruă Ping gah dêh čar, Khua pơ ala mơnuih ƀôn sang dêh čar, Kơnuk kơna, Jơnum min apăn bruă Jơnum min djop djuai ania mơnuih mơnam dêh čar Việt Nam hmâo nao dưm guang bơnga, tuĭ ñang hơdor glăi kơ ƀing ling tơhan pơsăn drơi ƀơi Gong kut hơdor glăi ƀing ling tơhan pơsăn drơi (jơlan Bắc Sơn, Hà Nội) hăng dưm guang bơnga, mut čuă pơsat jep Khua mir sir Hồ Chí Minh.

Khua git gai Ping gah, Kơnuk kơna mut čuă pơsat jep Khua mir sir Hồ Chí Minh

Amăng tơlơi tơhmit, pơpŭ, ƀing khua pơ ala hmâo kup akô̆ dô̆ hơdor glăi hơdôm mơnuih mơbruă mơng djuai ania hmâo tuh rơyuh pran jua drah kơtak, khin hơtai, gơgrong pran, pơsăn drơi yua kơ bruă tlaih rơngai djuai ania, pơlir hơbit lŏn ia, pơhlôm đơ đam dêh čar, yua kơ kơnuk kơna djop mơnuih dưm kơnar hăng bruă mă jar kơmar yôm phăn. Guang bơnga mơng grŭp hmâo glông čih “Hơdor na nao kơ ƀing tơhan pơsăn drơi”.

Gong kut hơdor kơ ƀing ling tơhan pơsăn drơi hrơi anai dưi gôm hăng bơnga hơdor glăi mơng hơdôm khul mut čuă

Amăng hrơi anun mơn, hơdôm grŭp khua pơ ala Ping gah Khul ling tơhan dêh čar, Ding jum Khul ling tơhan; Ping gah Kông ang dêh čar, Ding jum Kông ang; Ding jum wai lăng mơnuih mă bruă, tơhan rơka ruă hăng mơnuih mơnam; Ƀôn prong Hà Nội... hơdôm grŭp gơnong bruă, hơdôm khul amăng lŏn ia hăng jar kơmar hmâo nao dưm guang bơnga hơdor glăi ƀing ling tơhan pơsăn drơi ƀơi Gong kut hơdor kơ ƀing ling tơhan pơsăn drơi hăng mut čuă pơsat jep Khua mir sir Hồ Chí Minh./.

Siu H’ Prăk: Pơblang