Anai jing bruă jơnum yôm biă kiăng pơđĭ tui hăng ngă dlăm tui tơlơi rô nao rai ngă gŏp hing ang, gum pơgôp yôm phara, ngă hrŏm abih bang kơplah wah dua Ping gah, dua Kơnuk kơna hăng mơnuih ƀôn sang dua boh dêh čar Việt Nam - Lao. Ƀơi mông bưp, dua čô khua lăi nao dlăm gru grua hing ang mơ̆ng đưm hlâo, thâo gum djru nao rai; pơsit tơlơi rô nao rai Việt Nam - Lao jing gơnam yôm hloh mơ̆ng dua djuai ania, jing tơlơi khŏm hơmâo, jing pran kjăp kơtang prong biă mơ̆ng dua ping gah, dua kơnuk kơna khŏm pơtrut na nao truh kơ rơnuk tơdơi anai. khua git gai Ping gah Nguyễn Phú Trọng pơsit, Việt Nam - Lao lêng kơ gơgrong bruă yôm, jing dêh čar pơtom hiăp yôm phun mơ̆ng Việt Nam; laih dong lăi nao dlăm hơdôm bruă phun kiăng pơđĭ tui tơlơi rô nao rai dua ping gah, dua kơnuk kơna amăng hrơi blan pơ anăp.

Ƀơi mông bưp, Khua dêh čar Phạm Minh Chính hăng Khua dêh čar Lao Xỏn-xay Xỉ-phăn-đon tŭ ư dua ping gah, kơnuk kơna kiăng pơđĭ kjăp tui tơlơi gum pơgôp, pơtrut gong tơmeh phun ngă hrŏm gah bruă tơhan - rơnuk rơnua hăng pơtom hiăp; pơjing tơlơi pơplih phrâo amăng bruă ngă hrŏm bơwih ƀong; pơplih phrâo, pơđĭ tui boh tŭ yua ngă hrŏm amăng djŏp bruă, pơđĭ tui hloh tơlơi rô nao rai yôm pơphăn Việt Nam - Lao, yua kơ tơlơi gêh gal mơ̆ng mơnuih ƀôn sang dua bơnah, yua kơ tơlơi rơngai, ngă hrŏm hăng đĭ kyar amăng kual wơ̆t hăng ƀơi jar kmar.