VOV4.Jarai - Ngă tui jơlan hơdră bưp mơnuih ƀon sang hlâo mông jơnum lok 3 Khua mua git gai pơ ala mơnuih ƀon sang dêh čar tal 15, mơguah lơ 12/5, Khua git gai Ping gah ơi Nguyễn Phú Trọng hrŏm hăng khua mua pơ ala mơnuih ƀon sang dêh čar ƀon prong Hà Nội, anih plĕ hră ruah khua mrô 1, pơphun bưp mơnuih ƀon sang hơdôm boh kuâ̆n Đống Đa, Ba Đình, Hai Bà Trưng hơmâo bưp ƀơi anăp wơ̆t hăng lăng amăng tivi. Pơ ala kơ khua mua pơ ala mơnuih ƀon sang anih ruah khua mrô 1, Khua git gai Ping gah ơi Nguyễn Phú Trọng pơhmư̆ abih tơlơi pơgôp hiăp dlăm, lăi nao tơpă bruă kiăng pơsir, sit nik, rơđah samơ̆ hơmâo anŏ yôm hăng pơdah tơlơi gơgrong bruă mơng mơnuih ƀon sang ruah khua, gum pơđĭ tui anŏ klă mơng Khul khua pơ ala mơnuih ƀon sang ƀon prong Hà Nội hăng Khua mua git gai pơ ala mơnuih ƀon sang dêh čar tal 15.

Lăi nao bruă pơgăn hưp ham ƀong ngăn kơnuk kơna, bruă ngă soh glăi, Khua git gai Ping gah ơi Nguyễn Phú Trọng brơi thâo, ƀơi mông jơnum khua mua git gai Ping gah lok 5 phrâo rơgao, Ping gah Dêh čar hơmâo tŭ ư  akŏ pơdong Anom bruă git gai gưl tơring čar pơgăn hưp ham ƀong ngăn hơdrăp, bruă ngă soh glăi đah mơng pơtrut tui hơdôm tơlơi  hơmâo ngă amăng 10 thun rơgao, jing hơmâo tơlơi djơ̆ hrŏm ha amăng plĕ mơng 63 boh tơring čar, ƀon prong gum pơgăn glăi ƀing hơmâo tơlơi pơmin sat ba truh  tơlơi soh ƀong kông ngăn, prai prăk kơnuk kơna.

Siu H’Mai: Pơblang