VOv4.Jarai - Mơguah lơ 22/4, Ding jum kơđi čar, Khul apăn bruă Ping gah pơphun jơnum đơ đam dêh čar ƀơi anăp hăng lăng nao rai mơng ataih kiăng kơ hruă kjăp, pok pơhai ngă tui tơlơi pơtrun mrô 13 mơng Ding jum kơđi čar tal 13 amăng pơđĭ kyar bơwih ƀong huă - mơnuih mơnam hăng pơhlôm hơđong amăng kual lŏn dăo ia krông Cửu Long. Đĭ pơhiăp amăng mông jơnum, Khua git gai Ping gah ơi Nguyễn Phú Trọng hơmâo lăi nao 3 mơta tơlơi akŏ phun kiăng pơsir hĭ bruă Ding jum kơđi čar ba tơbiă tơlơi pơtrun phrâo kơ kual lŏn dăo ia krông Cửu Long.

Khua git gai Ping gah dêh čar ơi Nguyễn Phú Trọng đĭ pơhiăp amăng mông jơnum

Amăng anun hơmâo boh tơhnal phrâo amăng tơlơi pơtrun mrô 13, anai lĕ pơsit tong ten hơnong pơkă abih bang hăng sa, dua hơnong pơkă rơđah rơđông gir run truh thun 2030: “Kual lŏn dăo ia krông Cửu Long lĕ kual hơdip hiam klă hăng hơđong kjăp, pơdah gru grua yôm phảa mơng kual ia krông čroh hnoh; lĕ kual bơwih ƀong ngă đang hmua hơđong kjăp, pơplih phrâo hăng tŭ yua hloh amăng dêh čar, amăng kual hăng jar kmar”….Khua git gai Ping gah dêh čar ơi Nguyễn Phú Trọng biă ñu đing nao 5 mơta tơlơi kiăng pok pơhai ngă tui pơ anăp anai, rơkâo, Khul apăn bruă Ping gah dêh čar ječ ameč pơjing, ba tơbiă Jơlan hơdră bruă mă ngă tui tơlơi pơtrun, jao bruă tong ten brơi djop ding jum, gơnong bruă mơng gơnong glông truh ƀon lan amăng kual.

Siu Đoan: Pơblang