Mơguah lơ 16/6, ƀơi Sang bruă Ping gah, Khua git gai Ping gah ơi Nguyễn Phú Trọng git gai jơnum Ding jum kơđi čar, Khul khua git gai ping gah pơgôp hiăp kơ Kơčăo bruă klah čun 20 thun ngă tui tơlơi pơtrun mrô 23-NQ/TW, lơ 12/3/2003 mơng Khul khua gum bruă git gai Ping gah dêh čar tal 9 kơ pơtrut tui pran kơtang gum pơgôp abih bang djuai ania yua kơ mơnuih ƀon sang pơdrong, lŏn ia kơtang, mơnuih mơnam dưm kơnar, hơmâo tơlơi dưi pô, hơmâo tơlơi pơmin hiam. Tơdơi kơ hmư̆ Anom bruă git gai čih pơkra Kơčăo bruă lăi pơthâo hơdôm tơlơi amăng Kơčăo bruă, Ding jum kơđi čar hơmâo bơkơtuai, pơsit hrŏm: Amăng hơdôm thun rơgao, pran kơtang gum pơgôp djuai ania hơmâo pơđĭ kơjăp tui na nao, pơtrut tui tơlơi bơwih ƀong huă - mơnuih mơnam, pơhlôm pơgang lŏn ia, rơnuk rơnua, pơtom hiăp hăng čar rơngiao, lăng ba tơlơi hơdip mơda, pran jua kơ mơnuih ƀon sang; hơkrŭ kơjăp tui pran đăo gơnang mơng Mơnuih ƀon sang hăng Ping gah, Kơnuk kơna.

Bruă akŏ pơdong, pơplih pơkra ming Ping gah hăng anom bruă čar hơmâo lăng yôm biă mă. Ƀơi mông jơnum Ding jum kơđi čar ăt pơsit laih mơn: Gum pơgôp djuai ania jing gru grua hiam yôm biă, jing jơlan ngă bruă phun mơng Ping gah, jing pơsit djŏp tơlơi truh kih amăng bruă akŏ pơdong hăng pơgang Lŏn ia. Gum pơgôp abih bang mơnuih ƀon sang hluai tui pơtrut tui tơlơi dưi ngă pô xã hội chủ nghĩa, pơpŭ kơ tơlơi dưi ană mơnuih, tơlơi dưi mơnuih dŏ hơdip amăng dêh čar, tơlơi dưi ngă pô mơng Mơnuih ƀon sang.