VOV4.Jarai - Ƀơi sang bruă Ping gah dêh čar, yŭ tơlơi git gai mơng Khua git gai Ping gah ơi Nguyễn Phú Trọng, Ding jum kơđi čar, Khul khua git gai Ping gah pơphun bơbưp akŏ thun phrâo Nhâm Dần (2022), ƀrô hrơi ngă lơphet 92 thun hrơi akŏ pơdong Ping gah (lơ 3/2/1930 - 3/2/2022) hăng rơbêh 250 čô khua lĕ ƀing khua hơđăp mơng Ping gah, Kơnuk kơna, Jơnum min djŏp djuai ania mơnuih mơnam Việt Nam, Ding kơna hơđăp mơng Anom bruă Ping gah dêh čar djŏp rơwang thun. Lăi nao bruă mă amăng hrơi blan pơ anăp, Khua git gai Ping gah ơi Nguyễn Phú Trọng lăi, thun 2022, jing thun tô̆ tui ngă tui tơlơi pơtrun Jơnum ping gah dêh čar tal 13 hăng Akŏ bruă pơđĭ kyar bơwih ƀong huă - mơnuih mơnam 5 thun 2021-2025, biă ñu lĕ amăng hrơi mông jar kmar hăng amăng lŏn ia ta hơmâo tơlơi gêh gal ăt hơmâo mơn lu tơlơi tơnap, tơlơi lông, khŏm kiăng abih bang anom bruă Ping gah, mơnuih ƀon sang gir hloh, gum pơgôp hrŏm hơbit đah mơng hơmâo hơdră ngă bruă lăp djơ̆, ba lŏn ia ta pơđĭ kyar hơđong kơjăp; amăng anun kiăng hơmâo tơlơi gum pơgôp abih pran jua mơng khua mua prong mơng Ping gah, kơnuk kơna mơng djŏp rơwang thun ngă bruă, jing mơnuih ngă khua mơng hlâo amăng hơdôm anom bruă Kơnuk kơna hăng plơi pla.

Siu H’Mai: Pơblang