Tơdơi kơ jơnum ruah khua ping gah dêh čar tal 13, tơlơi pơhing ƀơi rŏng lŏn tơnah hơmâo lu tơlơi pơblih hmar đơi, tơnap tap, rung răng ngă kơ bruă pơtom hiăp mơ̆ng Việt Nam ăt bưp ƀu ƀiă ôh tơlơi tơnap tap lông lăng. Khă tui anun, thun 2023, 2024 hơmâo ƀuh bruă pơtom hiăp dêh čar mơak biă mă, na nao jing anih bơngač kơ lŏn ia. Bruă dêh čar ta čơkă Khua git gai ping gah, khua mir sir dêh čar Khač, ơi Tập Cận Bình, Khua mir sir dêh čar Mi, ơi Joe Biden, Khua git gai ping gah, Khua mir sir dêh čar Lao, ơi Thongloun Sisoulith, Khua ping gah mơnuih ƀôn sang dêh čar Kur, ơi Hun Sen, Hun Manet, phrâo anai hloh Khua mir sir dêh čar Nga, ơi Vladimir Putin hăng lu khua mua pơkŏn rai čuă Việt Nam; bruă Việt Nam mut hrŏm jai hrơi lu amăng bruă glăm ba hăng jar kmar laih anun gum hrŏm lu bơnah kah hăng ASEAN, Sang gum hơbit djop dêh čar, kual anet ter hang ia krông Mekong, khul APEC, AIPA, COP28….dưi lăng hơdôm bruă mă lăp hơdor pioh amăng gru phun, djru kơ bruă pơtong sit “Aka ƀu hơmâo ôh, tơlơi hing ang boh tơhnal yôm dêh čar, anŏ gêh găl, kơnuih hiam hăng anăn păn hmư̆ hing ƀơi jar kmar kah hăng ră anai”. Dưi hơmâo boh tơhnal djơh hăng anun lĕ, yua tơlơi lăng nao pơ anăp adih hăng sa bruă ngă pơtom hiăp phara biă mă mơ̆ng sa čô khua apăn akŏ dêh čar pơčrâo brơi. Anun lĕ Khua git gai ping gah ơi Nguyễn Phú Trọng pô ba jơlan. Ơi Lê Hoài Trung, ding kơna Khul git gai ping gah, Khua anom bruă pơtom hiăp ping gah dêh čar ta lăi:

“Ƀuh rơđah ơi Nguyễn Phú Trọng lăng yôm biă mă bruă pơtom hiăp, amăng lu tơlơi đĭ pơhiăp ñu hơmâo lăi nao na nao hăng djop djuai ania pơpă hai, lơ̆m pơđĭ kyar dŏ dong ƀong huă lêng kơ hơmâo hơdôm bruă khom pơsir dua mơta tơlơi pơtom hiăp amăng dêh čar hăng tač rơngiao, lăi rơđah bruă mă ƀu kơnong djă bong sui hloh kơ bruă pơtom hiăp amăng lăm dêh čar hăng tač rơngiao đôč ôh, dŏ jing pran kơtang akŏ pơdong lŏn ia pơđĭ kyar. Tơlơi dơ̆ng lĕ tơlơi pơmin mơ̆ng ơi Nguyễn Phú Trọng khua git gai ping gah dêh čar ta kiăng, ngă hiư̆m pă jơlan hơdră pơtom hiăp dêh čar ta lĕ rơngai, ngă khua pô gum hrŏm lu bơnah, Việt Nam jing gơyut hăng djop dêh čar, jing ding kơna hur har amăng bruă glăm ba hrŏm khul gum hơbit jar kmar; kiăo tui khăng khŏp tong ten tơlơi pơmin, tơlơi phiăn djơ̆ beč bal pơsir djop bruă hơmâo, khom thâo tañ tơlơi pơhing phrâo, anŏ hlăk hơmâo tơlơi pơhing amăng dêh čar hăng ƀơi rŏng lŏn tơnah. Boh nik ñu khua git gai ping gah đing nao biă mă hăng lăi, tơdah nao soh glăi jơlan hơdră amra ba anăp soh glăi abih bang”.

Khua git gai ping gah ơi Nguyễn Phú Trọng đing nao biă mă amăng bruă pơtom hiăp khom ngă tui anai: “Khom ngă tui kjăp pran jua djơ̆ tơlơi phiăn, laih anun ngă tui rơ-un huin rah kơ hơdră ngă tui; rơ-un muăn, pơmin hmar thâo rơgơi samơ̆ ăt khom khut khăt mơ̆n, ngă tui kjăp; beč bal, thâo pơčeh phrâo samơ̆ khom kjăp pran jua khin hơtai, kiăng găn rơgao djop tơlơi lông lăng, tơnap tap pơ anăp adih, yua kiăng rơngai, mơai pô kơ djuai ania, rơngai hơjăn, tơlơi mơak hlak kơ ană plơi pla; thâo gum pơgôp, khăp pap samơ̆ ăt khom khut khăt, sơ̆n pran jua pơgang boh tŭ yua kơ dêh čar-djuai ania”. Laih anun, ƀơi mông jơnum kơ bruă pơtom hiăp dêh čar thun 2021, ơi Nguyễn Phú Trọng Khua git gai ping gah dêh čarta ha wơ̆t dơ̆ng lăi nao tơlơi pơmin kiăng: “Pơtom hiăp Việt Nam lĕ khom beč bal hmar prăp lui hlâo, pơčeh phrâo hăng rơ-un muăn hloh bơwih brơi pơđĭ kyar bơwih ƀong huă hăng kơtưn kơnuih hiam kơ lŏn ia”….brơi ƀuh tơlơi đing nao mơ̆ sa tơlơi dŏ bơngơ̆t bơngañ mơ̆ng khua mua pơprong hloh ƀơi dêh čar amăng bruă pơtom hiăp. Ƀu ƀiă ôh, rim wơ̆t ơi Nguyễn Phú Trọng hơmâo pơtă pơtăn lĕ: gah klôn kơ ƀing ngă bruă pơtom hiăp lĕ hơmâo abih bang ping gah, mơnuih ƀôn sang, ling tơhan. Anun jing phun akha pioh kơ ƀing khua anih jưh pơ ala dêh čar ta ngă giong bruă jao ngă gơyut gơyâo hăng jar kmar, bơwih brơi pơđĭ kyar bơwih ƀong huă mơnuih mơnam lŏn ia.

Kơ-iăng nai tha prin. Nai prin tha, ơi Dương Văn Quảng, khua hơđăp Sang hră gưl prong hrăm bruă pơtom hiăp gah Ding jum pơtom hiăp dêh čar lăi: Lăi nao kơ Khua git gai ping gah ơi Nguyễn Phú Trọng lĕ lăi nao kơ gru kơđŏm mơ̆ng sa čô mơnuih “trut a apui dŏ jă na nao”, ba pran jua pơtrut bruă pơtom hiăp Việt Nam:

“Khua git gai ping gah ơi Nguyễn Phú Trọng rim wơ̆t jơnum kơ bruă pơtom hiăp lêng kơ lăi nao bruă pơtom hiăp, pơtă pơtăn ƀing ngă bruă pơtom hiăp Việt Nam tong ten biă mă. Hơdôm boh yôm phun tơlơi pơtă pơtăn anun lĕ sa čô ngă bruă pơtom hiăp khom pơ ala kơ gru grua djuai ania. Bruă pơtom hiăp khom lăng kơ anŏ tŭ yua kơ dêh čar kơ djuai ania, laih dơ̆ng mơnuih rơnuk anai, khom hơmâo tơlơi thâo hmao kru hăng rơnuk phrâo, hơdră phrâo laih anun khom kơsem min. Ƀing ta thâo hluh ƀơi rŏng lŏn tơnah kah dưi bơkơtuai hăng gơñu. Anun lĕ tơlơi pơtă pơtăn mơ̆ng Khua git gai ping ga juăt pơtô lăi kơ ƀing ngă bruă pơtom hiăp Việt Nam”.

Bơ khua anih jưh pơ ala Việt Nam dŏ ƀơi dêh čar Nga, ơi Đặng Minh Khôi hơdor na nao kơ tơlơi pơtă pơtăn mơ̆ng sa čô khua prong hloh lŏn ia ta anun lĕ rim čô khua anih jưh pơ ala, khua anom bruă pơ ala Việt Nam dŏ mă bruă ƀơi tač rơngiao khom pơdah thâo gru grua hiam, gru grua klă djuai ania, tơlơi dŏ dong ƀong huă, kơnuih gru mơ̆ng djuai ania Việt. Biă mă ñu hơdôm mơnuih ngă bruă pơtom hiăp dŏ pơtrut bruă mă pran jua thâo gum pơgôp, thâo khăp pap, thâo luă gŭ hăng thâo pơkơdong glăi tơlơi hơgĕt, thâo mông gêh găl, thâo hluh arăng thâo hluh ta pô, thâo kơsung nao hăng thâo kơdun glăi djơ̆ lăp. Abih bang yua kơ boh tŭ yua brơi dêh čar, djuai ania:

“Khua git gai ping gah lăi lĕ, bruă pơtom hiăp Việt Nam khom pơrơdah hăng gru grua hiam, gru grua phun, kơnuih ană mơnuih Việt Nam. Djop bruă ngă, mông găl pơpă hai, ăt khom kjăp pran jua tơlơi pơmin tong ten samơ̆ ăt thâo ngă tơdu rơ-un muăn kah hăng phun ale huin, khom djă pioh pran jua bruă mă hăng tơlơi khin hơtai kơsung nao, mah mông anun hiư̆m pă hai ăt khom kjăp tong ten djơ̆ hăng jơlan hơdră pơtrun”.

Khua anih jưh pơ ala dêh čar Khač ƀơi Việt Nam, ơi Hùng Ba lăi pơtong: Hơdôm thun giăm anai, Việt Nam ngă tui jơlan hơdră “pơtom hiăp huin hrup phun ale” beč bal prăp hlâo hơdră či ngă, tui hăng tơlơi kiăng wai pơgang tơlơi rơnuk rơnua, rơngai mơ-ai pô lŏn ia, hur har pơtrut tui bruă ngă giăng mah hăng djop dêh čar amăng rŏng lŏn tơnah. Bruă mă pơtom hiăp mơ̆ng Việt Nam hơmâo ba glăi lu boh tơhnal tŭ yua yôm, đing nao pơđĭ kyar tơlơi ngă giăng gơyâo hăng dêh čar jĕ giăm ieo gah, dêh čar pơprong hăng hơdôm dêh čar ngă giăng mah mơ̆ng hlâo gru grua; khut khăt dong yua hơdră ngă hrŏm lu bơnah dêh čar.

Hơdôm boh tơhnal anun djă pioh gru kơđŏm mơ̆ng “mơnuih pơtrut a apui” lĕ khua git gai ping gah ơi Nguyễn Phú Trọng yơh pô pơtrut. Hăng tơlơi pơmin mơ̆ng ñu ăt amra jing pran jua pơtrut ngă tui bruă pơtom hiăp Việt Nam găn rơgao hĭ tơlơi lông lăng pơ anăp, ƀu kơdun ôh sit bưp tơlơi gun, tơnap tap găn jơlan amăng rŏng lŏn tơnah hơmâo lu tơlơi rung răng bơtơpư̆ pran jua kah hăng ră anai.