VOV4.Jarai - Tlam lơ 21/3 ƀơi Sang bruă Ping gah dêh čar, Khua git gai Ping gah ơi Nguyễn Phú Trọng tŭ jum ơi Dato’ Sri Ismail Sabri bin Yaakob, Khua dêh čar Malaysia, nao bưp, mă tơngan amăng hrơi rai čuă sit nik dêh čar Việt Nam. Khua dêh čar Malaysia lăi pơthâo hăng Khua git gai Ping gah kơ boh than mơng mông pơhiăp tom hăng Khua dêh čar ơi Phạm Minh Chính, lăi pơtŏng Malaysia lăng yôm tơlơi rô nao rai ngă gŏp yôm hăng Việt Nam, kiăng dua bơnah pơtrut tui dong tơlơi ngă hrŏm amăng bruă bơwih ƀong, sĭ mơdrô, tuh pơ plai hăng pơbưp mơnuih ƀon sang, gơñu amra pơtrut tui tơlơi ngă hrŏm tuai hyu ngui hăng ngă hrŏm gah ia rơsĭ hăng Việt Nam đah mơng mă yua hơdôm tơlơi gêh gal mơng dua boh dêh čar. Khua git gai Ping gah ơi Nguyễn Phú Trọng ăt bơkơtuai mơn hăng Khua dêh čar Malaysia kơ tơlơi dưi pơđĭ kyar bơwih ƀong mơnuih mơnam mơng Việt Nam, pơsit jơlan hơdră ngă bruă mơng akŏ truh pơ tlôn mơng Việt Nam lĕ lăng yôm, pơpŭ, laih anun čang rơmang pơtrut tui dong tơlơi rô nao rai ngă gŏp prong hăng Malaysia, kiăng dua bơnah pơtrut tui dong hơdôm tơlơi hơmâo ngă, pơđĭ tui anŏ klă mơng bruă ngă hrŏm, amăng anun pơtrut đĭ tơlơi rô nao rai hăng hodôm ping gah, pơtrut ngă hrŏm dua bơnah ăt kah hăng amăng ASEAN hăng hơdôm mông jơnum amăng kual hăng jar kmar.

Siu H’Mai: Pơblang