Khua git gai Ping gah lăi nao hơdôm tơlơi dưi ngă prong, abih bang mơ̆ dêh čar Việt Nam gir ngă, akŏ pơdong tơlơi hơmâo, tơlơi hmư̆ hing, hơmâo jar kmar đăo gơnang tui hrơi anai; pơsit jơlan hơdră pơtom hiăp rơngai, gơgrong mă pô, ngă hrŏm pơtom hiăp hăng lu dêh čar, amăng anun lăng yôm tơlơi nao rai hăng hơdôm boh dêh čar ieo gah. Khua dêh čar Anwar Ibrahim lăi pơthâo hăng Khua git  gai Ping gah ơi Nguyễn Phú Trọng kơ bruă jơnum bơkơtuai hăng Khua dêh čar ơi Phạm Minh Chính, lăi pơtŏng dlăm kiăng pơtrut tui tơlơi ngă hrŏm abih bang hăng Việt Nam, amăng anun hơmâo ngă hrŏm gah ping gah, lăi pơthâo tơlơi rơgơi git gai hăng pơđĭ kyar, ngă hrŏm bơwih ƀong huă, pơgang lŏn ia, rơnuk rơnua hăng amăng hơdôm bruă phrâo kah hăng bơwih ƀong mrô, rơnuk rơnua plang internet, hăng pơkơdong glăi tơlơi lông lăng rơnuk rơnua aka ƀu phiah ƀuh mơ̆ng đưm hlâo.

Khua dêh čar lăi pơthâo hăng Khua git gai Ping gah dêh čar ta kơ bruă pơgăn hưp ham ƀong ngăn kơnuk kơna, tơlơi soh sat ƀơi Malayasia laih anun čang rơmang dua bơnah ngă hrŏm, lăi pơthâo hloh dŏng gah bruă anai. Khua git gai Ping gah ơi Nguyễn Phú Trọng đăo gơnang tal rai čuă jơmư mơ̆ng Khua dêh čar ơi Anwar Ibrahim jing gru kơđŏm phrâo, gum pơđĭ kyar hloh tơlơi rô nao rai ngă gŏp kơplah wah dua boh dêh čar.