VOV4.Jarai-Tlam lơ 10/8, ƀơi sang bruă Ping gah dêh čar, ơi Nguyễn Phú Trọng Khua git gai ping gah dêh čar ta hơmâo tŭ jum ơi Anuphap Tunalom, ding kơna git gai ping gah dêh čar Khua git gai ping gah, khua anom bruă pơ ala mơnuih ƀôn sang plơi prong jưh jom Vientian dêh čar Lao, hlăk rai čuă jơmư hăng mă bruă ƀơi Việt Nam. Ƀơi mông tŭ jum, ơi Nguyễn Phú Trọng lăi, Việt Nam lăng yôm hăng đing nao hlâo hloh kơ bruă ngă giăng mah rô nao rai dua bơnah, tơlơi ngă adơi ayong yôm pơphăn Việt Nam-Lao laih anun dong yua kơtang biă mă, hlôm bôm amăng bruă pơblih phrâo dêh čar Lao.

Khua git gai ping gah ơi Nguyễn Phú Trọng brơi thâo, tơlơi ngă giăng mah Việt Nam-Lao jai hrơi pơđĭ kyar, kjăp hloh, tŭ yua amăng djop bruă, djru hrom yôm biă mă pơgang hơđong bruă kơđi čar, rơnuk rơnua lŏn ia hăng pơđĭ kyar bơwih ƀong huă mơnuih mơnam rĭm boh dêh čar, laih dơ̆ng lăi pơthâo anăp či ngă bruă hrom djop gơnong bruă, djop gưl anom bruă ping gah, gong gai kơnuk kơna dua bơnah pơ anăp adih.

Khua git gai ping gah dêh čar ta čang rơmang khua mua plơi prong jưh jom Vientian dêh čar Lao ăt ngă hrom tong ten hăng khua mua plơi prong jưh jom hà Nội laih anun hơdôm tơring čar, ƀôn prong gah Việt Nam kiăng pơtruh nao rai tơlơi pơhing, kah pơpha tơlơi thâo thăi amăng djop bruă mă.

Nay Jek: Pơblang