VOV4.Jarai - Tlam lơ 16/5, ƀơi sang bruă Ping gah, Khua git gai Ping gah ơi Nguyễn Phú Trọng tŭ jum Khua mir sir Grek yă Ca-tê-ri-na Xa-kê-la-rô-pu-lu hăng khua mua prong mơng Kơnuk kơna Grek nao bưp, mă tơngan ƀrô tal rai čuă dêh čar Việt Nam. Khua git gai Ping gah ơi Nguyễn Phú Trọng hok mơ-ak čơkă Khua mir sir Ca-tê-ri-na Xa-kê-la-rô-pu-lu hăng khua mua prong mơng dêh čar Grek hơmâo rai čuă sit nik dêh čar Việt Nam hăng bơni hơ-ơč kơ yă Ca-tê-ri-na Xa-kê-la-rô-pu-lu hơmâo ruah jing đah kơmơi blung a ngă Khua mir sir dêh čar Grek.

Mông tŭ jum khua mua mơng Khua git gai Ping gah Nguyễn Phú Trọng

Khua git gai Ping gah ăt hơmâo lăi hăng Khua mir sir Grek kơ hơdôm tơlơi dưi ngă, tơlơi kiăng pơđĭ kyar mơng Việt Nam hăng jơlan hơdră pơtom hiăp rơngai, gơgrong mă pô, mơ-ak klă, ngă hrŏm hăng đĭ kyar; Việt Nam jing gơyut, gŏp ngă hrŏm klă, gơgrong bruă, gir mut hrom hăng jar kmar. Dua čô khua ăt tŭ ư hrŏm pơđĭ tui tơlơi ngă hrŏm gah kơđi čar, ngă hrŏm, djru nao rai amăng hơdôm mông jơnum prong ƀơi jar kmar.

Siu H’Mai: Pơblang