Nao jơnum hrŏm tal anai dŏ hơmâo rơbêh 500 čô pơ ala rai mơ̆ng sang bruă mơdrô ba akŏ mơ̆ng dua bơnah dêh čar. Tal bơkơtuai nao rai anai ƀu kơnong pơjing anih anom pơtruh brơi khul ngă bruă mơdrô, bơwih ƀong huă đôč ôh, dŏ ngă anŏ gơgrong ba yom amăng bruă pơtrut ngă hrŏm bơwih ƀong huă, sĭ mơdrô hăng tuh pơ alin dua bơnah.

Pơhiăp ƀơi mông jơnum, Khua git gai ping gah ơi Tô Lâm lăi pơthâo tơlơi pơhing bơwih ƀong huă-mơnuih mơnam ƀơi Việt Nam thun 2024 hăng 6 blan akŏ thun 2025 hơmâo tŭ mă lu boh tơhnal pơđĭ kyar klă; lăi pơtong thun 2025 ƀu kơnong thun “rơnoh pơđĭ kyar kơtang” pioh ngă giong tơhnal pơkă pơđĭ kyar mơ̆ng thun 2021-2025 đôč ôh, dŏ jing tơlơi gơgrong tŏ tui, pơjing atur yom hăng pran kơtang ngă tui tŭ yua 2 tơhnal pơkă 100 thun, ba lŏn ia yak nao amăng rơnuk thun phrâo mơ̆ng djuai ania. Kơ bruă ngă hrŏm, pơhưč tuh pơ alin dêh čar tač rơngiao, Việt Nam pơblih mơ̆ng tơlơi pơmin “Iâu pơhưč tŭ kơ prong” jing “Iâu pơhưč tui bruă ngă kơjăp”, hơmâo tơlơi ruah mă, đing nao hlâo hơdôm akŏ bruă boh thâo ia rơgơi phrâo, tŭ yua, rơgoh hơdjă, git gai wai lăng phrâo kơhnâo rơgơi, pơđĭ rơnoh yom, hơmâo anŏ bơbeč prong, pơtruh nao rai bruă ngă pơkra ming hăng sĭ mơdrô đơ đam rŏng lŏn tơnah.