Hơdor glăi 80 thun hrơi Hơkrŭ blan čơpăn truh kih hăng Hrơi akŏ pơdong kơnuk kơna lŏn ia lơ 2/9; 80 thun Hrơi gru grua tơhan kông an mơnuih ƀôn sang Việt Nam hăng 20 thun Hrơi mơak abih bang mơnuih ƀôn sang gum hrŏm pơgang lŏn ia, mơguah lơ 14/8, ƀơi să Tân Trào, Tuyên Quang jơnum Hrơi jơnum mơak abih bang mơnuih ƀôn sang ngă hrŏm pơgang lŏn ia thun 2025 hăng mă yua Rup trah “Wa Hồ ƀơi Tân Trào”.

Pơhiăp ƀơi mông jơnum, Khua git gai ping gah ơi Tô Lâm lăi rơđah, Hrơi mơak jơnum prong anai mông gêh găl hơdor glăi gru phun dêh čar, hơdor glăi, bơni hơ-ơč hơdor tơngia hăng lăi pơtong tơlơi gơgrong ba yom, djru hrŏm prong prin mơ̆ng mơnuih ƀôn sang amăng bruă pơgang tơlơi rơnuk rơnua lŏn ia, pơhlôm tơlơi hơđong mơnuih mơnam, ăt djă kơjăp bruă mă tui gru grua đưm yom pơphăn anun amăng rơnuk lŏn ia pơblih phrâo, rơnuk pơdrong sah, mut phung hăng pơđĭ kyar. Kiăng djă kơjăp tơlơi kơtang anun mơ̆ng mơnuih ƀôn sang, tơlơi glăm ba phun mơ̆ng tơhan kông an mơnuih ƀôn sang amăng bruă pơgang rơnuk rơnua hơđong, Khua git gai ping gah rơkâo kơ tơring čar Tuyên Quang, să Tân Trào ăt lăi pơthâo, pơtô ba tong ten ngă tui tơpă djop jơlan hơdră mơ̆ng Ping gah, Kơnuk kơna kơ bruă akŏ pơdong khul abih bang mơnuih ƀôn sang gum hrŏm pơgang lŏn ia, thâo hluh ten tơlơi kiăng mă mơnuih ƀôn sang yơh ngă anŏ phun, mơnuih ƀôn sang dŏ tong krah hăng pô kơ bruă akŏ pơdong laih anun pơgang lŏn ia, hơkrŭ lĕ bruă mă kơ mơnuih ƀôn sang, yua mơnuih ƀôn sang, mơ̆ng mơnuih ƀôn sang yơh ngă pô.