Tlam lơ 21/9, ƀơi Hà Nội, Grup tuh tia pơkra gơnam - Apui lơtrik Dêh čar Việt Nam (Petrovietnam) pơphun Ngă lơphet 50 thun akŏ pơdong hăng čơkă Miđai Mă bruă tal 1. Nao pơhmư̆ hăng pơhiăp ƀơi mông Jơnum ngă lơphet, Khua git gai Ping gah lăi dlăm biă tơlơi gơgrong bruă mơ̆ng Petrovietnam, rim thun gum pơgôp 20-30% prăk kơ kơnuk kơna, djru ngă hơđong tơlơi bơwih ƀong, pơhlôm rơnuk rơnua apui lơtrik dêh čar; pơsit tơlơi kơdrưh mơ̆ng anom bơwih ƀong kơnuk kơna wai lăng nao hlâo ba jơlan mut hrŏm bơwih ƀong jar kmar.

Yak amăng rơwang đĭ kyar phrâo, Khua git gai Ping gah ơi Tô Lâm kiăng Petrovietnam pơtrut tui na nao gru kơnuih Tơhan sông kơtang či akŏ pơdong Grup tuh tia pơkra gơnam - Apui lơtrik Dêh čar kjăp kơtang; Petrovietnam khŏm jing phun atur pơjing rai anŏ yôm amăng bruă pơkra măi mok phrâo, nao hlâo amăng bruă pơkra apui ayuh phrâo hăng apui ayuh hơdjă; mă boh thâo ia rơgơi, pơplih pơčeh phrâo, hăng mă yua boh thâo mrô ngă gai kưl đĭ./.