VOV4.Jarai - Ƀrô hrơi Tê̆t Bun Pi May dêh čar Lao hăng Tê̆t Chôl Chnam Thmay mơng dêh čar Kur, Khua git gai Ping gah ơi Nguyễn Phú Trọng mơit hră hăng bơnga bơni hơ-ơč kơ ơi Thong-lun Xỉ-xu-lit , Khua git gai Ping gah dêh čar Lao, Khua mir sir dêh čar Lao hăng ơi Hun Sen, Khua git gai Ping gah dêh čar Kur, Khua dêh čar Kur. Tơlơi čih amăng hră bơni hơ-ơč mơng Khua git gai Ping gah Nguyễn Phú Trọng lăi: Ping gah, Kơnuk kơna hăng Mơnuih ƀon sang Việt Nam mơ-ak biă mă kơ tơlơi rô nao rai ngă gŏp, pŭ ƀăn, amăng abih bang bruă kơplah wah Việt Nam - Lao jai hrơi đĭ kyar, dlăm hloh, sit nik hăng tŭ yua amăng djŏp bruă. Ƀrô hrơi Tê̆t tui phiăn mơnuih ƀon sang Kur, pơ ala kơ Ping gah, Kơnuk kơna hăng Mơnuih ƀon sang Việt Nam, Khua git gai ping gah Nguyễn Phú Trọng mơit kơ ơi Hun Sen hăng khua mua amăng Ping gah dêh čar Kur, Kơnuk kơna hăng Mơnuih ƀon sang dêh čar Kur tơlơi kiăng khăp, ƀu-eng adơi ayong, hăng tơlơi bơni hơ-ơč thun phrâo hiam drơi jăn pran jua, yâo mơ-ak, pơdrong asah.

Siu H’Mai: Pơblang