VOV4.Jarai - Tlam lơ 28/6, tơdơi kơ trun pơ rơdêh por London Heathrow pơphun nao čuă sit nik dêh čar Anglê, Khua git gai pơ ala mơnuih ƀon sang dêh čar ơi Vương Đình Huệ hrŏm hăng Khul khua pơ ala mơnuih ƀon sang dêh čar ta nao cuă Sang anih jưh pơ ala dêh hăng bưp mơnuih ƀon sang Việt Nam ƀơi dêh čar Anglê. Mơng bruă hơduah tơña, hmư̆ tơlơi lăi glăi mơng neh met wa Việt Nam, ơi Vương Đình Huệ bơni kơ neh met wa hơmâo gum pơgôp, hơdip rơnôm, mut hơdip hrŏm mơ-ak hăng mơnuih ƀon sang ƀơi dêh čar anai. Biă ñu hơdôm bruă mă sit nik mơng hơdôm khul grup hơmâo djru, anăp nao plơi pla, lŏn ia ta. Mrô rơbêh 3 klăk 500 rơbâo dolar Mi djru kơ neh met wa amăng dêh čar ta amăng tal klin Covid-19 phrâo rơgao jing gru pơsit brơi tơlơi anun. Hơdôm tơlơi khăp ƀu-eng anun lăp djă pioh biă mă.

Khua git gai pơ ala mơnuih ƀon sang bưp mơnuih ƀon sang Việt Nam ƀơi Anglê

Khua git gai pơ ala mơnuih ƀon sang dêh čar ta lăi, hơmâo anŏ kơtang, pơđĭ kyar mơng khul grup hrơi blan rơgao, yua hơmâo tơlơi gum djru ƀu ƀiă ôh mơng Sang anih jưh pơ ala Việt Nam ƀơi dêh čar Anglê. Khua git gai pơ ala mơnuih ƀon sang ăt čang rơmang mơnuih ƀon sang Việt Nam ƀơi dêh čar Anglê gum pơgôp, lăng ba dong tơlơi hơdip mơnuih ƀon sang Việt Nam đah mơng ƀuh mơnuih rơgơi djru ngă bruă.

Siu H’Mai: Pơblang