VOV4.Jarai - Tlam lơ 22/8, ƀơi Ƀirô mă bruă, Khua git gai pơ ala mơnuih ƀon sang dêh čar ơi Vương Đình Huệ hơmâo nao pơhmư̆ mông mă bruă kơplah wah Grup pel ĕp mơng Ƀirô Khua pơ ala mơnuih ƀon sang dêh čar hăng Jơnum min mơnuih ƀon sang ƀôn prong Hà Nội kơ bruă pơkrem, pơgăn yua khưi khai. Hră lăi pơthâo mơng Jơnum min mơnuih ƀon sang ƀôn prong Hà Nội pơsit tong, bruă pơkrem, pơgăn yua khưi khai lêng hơmâo tơlơi đing nao, git gai khut khăt hăng pơsit tong, anai lĕ bruă akŏ phun amăng ƀôn prong.

Mông mă bruă kơplah wah Khua git gai pơ ala mơnuih ƀon sang dêh čar hăng Jơnum min mơnuih ƀon sang ƀôn prong Hà Nội

Sit biă ñu rơwang thun 2016-2021, ƀôn prong hơmâo pơkrem giăm 42.000 klai prăk. Đĭ pơhiăp amăng mông mă bruă, Khua git gai pơ ala mơnuih ƀon sang dêh čar ơi Vương Đình Huệ brơi thâo, ƀôn prong Hà Nội lĕ anih lêng kơ djă pioh pran gơgrong hloh amăng bruă pơkrem, pơgăn yua khưi khai amăng bruă čar kah hăng hơjăn. Pơ anăp anai, ƀôn prong Hà Nội kiăng pel ĕp anăm brơi yua lŏn ngă đang hmua ča čot; tañ hơmâo akŏ bruă mă yua lŏn mơnai, sem lăng kiăng kơ hơmâo kual lŏn pioh pơđĭ kyar bơwih ƀong, mă yua klă hloh lŏn mơnai.

Siu Đoan: Pơblang