Ƀrô tal hơdor glăi 94 thun hrơi akŏ pơjing Khul pơlir hơbit đah kơmơi Việt nam hăng hrơi đah kơmơi Việt Nam (20/10), tlam lơ 15/10, ƀơi Ƀirô Khua pơ ala mơnuih ƀôn sang dêh čar, Khua git gai pơ ala mơnuih ƀôn sang dêh čar ơi Trần Thanh Mẫn git gai mông bưp ƀing đah kơmơi ngă khua pơ ala mơnuih ƀôn sang gah gơnong glông, ƀing đah kơmơi ngă khua mua amăng anom bruă Khua pơ ala mơnuih ƀôn sang dêh čar, Anom bruă kơsem min čih pơkra phiah phiăn. Đĭ pơhiăp amăng mông bưp, Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong gru grua hing ang mơng đah kơmơi Việt Nam pơgôp prong amăng bruă wai pơgang, pơjing lŏn ia, hơmâo wa Hô pơpŭ brơi 8 tơlơi čih yôm “Anh hùng-Bất khuất-Trung hậu-Đảm đang”.

Thun 2025 lĕ thun pơtrut kơtang kiăng pơgiong hơnong pơkă bơwih ƀong-mơnuih mơnam 5 thun; ngă atur kiăng ngă tui trih kih tơlơi pơtrun mơng Jơnum Ping gah tal XIII; prap lui jơnum Ping gah djop gưl, anăp nao Jơnum Ping gah đơ đam dêh čar tal XIV, Khua git gai pơ ala mơnuih ƀôn sang dêh čar čang rơmang, ƀing đah kơmơi ngă Khua pơ ala mơnuih ƀôn sang, ƀing đah kơmơi ngă khua mua, ngă mơnuih apăn bruă, mơnuih mă bruă amăng anom bruă Khua pơ ala mơnuih ƀôn sang dêh čar, anom kơsem min čih pơkra phiah phiăn tŏ tui boh than dưi ngă, gir run pơgôp prong amăng bruă mă mơng Ƀirô Khua pơ ala mơnuih ƀôn sang dêh čar.