Amăng tal nao čuă jơmư sit nik dêh čar Cuba, mơguah lơ 19/4, tui mông dêh čar Cuba, jing tlam mơmŏt tui mông Việt Nam ƀơi plơi prong jưh jom Lahabana, Khua git gai pơ ala mơnuih ƀôn sang dêh čar ta ơi Vương Đình Huệ hăng grup khua mua mơ̆ng Việt Nam nao čuă jơmư, pơhiăp tom khua mua, ƀing mă bruă amăng sang bruă khua anih jưh pơ ala  Việt Nam laih anun bưp mơnuih ƀôn sang Việt Nam ƀơi dêh čar Cuba. Pơhiăp ƀơi mông bưp, Khua git gai pơ ala mơnuih ƀôn sang dêh čar ta ơi Vương Đình Huệ pơdah rai pran jua mơak dưi pơwơ̆t glăi čuă dêh čar Cuba hiam rô̆; bưp hăng ră ruai hrom ƀing mă bruă amăng sang bruă khua anih jưh pơ ala laih anun mơnuih ƀôn sang Việt Nam dŏ ƀơi dêh čar Cuba, sa boh dêh čar ataih biă mă mơ̆ng dêh čar ta gah adih ha mơkrah boh lŏn kah truh.

Khua git gai pơ ala mơnuih ƀôn sang dêh čar ta brơi thâo,  anai lĕ tal nao čuă mơ̆ng khua mua pơprong dêh čar Việt Nam truh pơ dêh čar Cuba yap mơ̆ng thun 2022 truh ră anai. Rơngiao kơ bruă mă sit nik mơ̆ng grup, lu khua mua ding jum, anom bruă gơnong dlông, dŏ hơmâo bruă mă hrom mơ̆ng hơdôm tơring čar laih anun sang bruă sĭ mơdrô kiăng pơtrut bruă rô nao rai sĭ mơdrô dua bơnah dêh čar. Ơi Vương Đình Huệ rơkâo khua anih jưh pơ ala, khul ngă bruă sĭ mơdrô hlăk dŏ mă bruă ƀơi dêh čar Cuba, kơtưn bruă ngă hrom djru nao rai, gum pơgôp tong ten hloh, kah pơpha tơlơi thâo thăi amăng bruă mă. Pran jua khin hơtai ngă bruă ngă bruă pơ dêh čar ta pô ăt kah hăng pok pơhai mă bruă ƀơi dêh čar Cuba mơ̆n.