Khua git gai pơ ala mơnuih ƀôn sang dêh čar hơmâo nao čuă Sang măi pơkra rơdêh đuăi hăng apui lơtrik Xiaomi hăng grup Thị Nguyên (CVTE); nao čuă anih pơdă prưng gơnam tam, sang măi pơkra rơdêh đuăi hăng apui lơtrik hrŏm hăng hơdôm gơnam pơdah pơlăng nao rai mă yua boh thâo ia rơgơi AI amăng lu bruă mă mơng CVTE. Khua git gai pơ ala mơnuih ƀôn sang dêh čar ăt kơtuă hăng lăng yôm hơdôm tơlơi dưi pơđĭ kyar mơng Xiaomi hăng CVTE; brơi thâo, Việt Nam amra čơkă hơdôm anom bơwih ƀong yua boh thâo ia rơgơi pơprong nao ĕp lăng kơ bruă tuh pơ alin, pok prong ngă hrŏm, sit biă ñu amăng bruă pơkra rơdêh đuăi hăng apui lơtrik, pil, gơnam răk pioh apui lơtrik, boh thâo ia rơgơi, măi mok pơđuăi hajăn hăng pơđĭ kyar glông sĭ mơdrô gơnam.

Khua git gai pơ ala mơnuih ƀôn sang dêh čar ơi Trần Thanh Mẫn pơsit tong, Ƀirô Khua pơ ala mơnuih ƀon sang dêh čar Việt Nam lêng kơ đing nao bruă čih pơkra tơlơi phiăn, ngă gêh gal bruă tuh pơ alin, bơwih ƀong sĭ mơdrô tui jơlan gah tong ten, hơđong hăng gêh gal, pơhlôm brơi tơlơi dưi djơ̆ tơlơi phiăn mơng anom bruă tuh pơ alin; amra đing tơnga hmư̆ hơdôm tơlơi rơkâo sit nik mơng anom bơwih ƀong sĭ mơdrô, tŏ tui pơgiong tơhnal pơkă djơ̆ tơlơi phiăn, ngă gêh gal brơi anom bơwih ƀong mơng tač rơngiao tuh pơ alin hăng bơwih ƀong sui thun, tŭ yua ƀơi Việt Nam, hluai tui bruă pơpŭ tơlơi phiăn hăng pơhlôm bơkơnar tơlơi dưi kơplah wah djop bơnah.