Amăng mông bưp, mơnuih ƀôn sang hơdôm boh phương Sông Cầu, Xuân Đài hăng să Xuân Thọ rơkâo tơring čar Dak Lak tañ pơsir hĭ tơlơi gun ƀơi hơdôm akŏ bruă ngă sui thun, tuh pơ alin ring bruă pơhlôm hlâo hŭi lŏn tơhroh ƀơi hang ia rơsĭ, pơsir hĭ bruă dŏ đôm glăi ƀơi kual plơi prong Sông Cầu hăng dưm dăp anih mă čuah kiăng djru brơi bruă man pơkra ƀơi anih.

Pơđut hĭ mông bưp mơnuih ƀôn sang ruah khua, ơi Nguyễn Thanh Nghị tŭ yap hơdôm tơlơi rơkâo mơng mơnuih ƀôn sang, rơkâo gong gai hăng anom bruă bơdjơ̆ nao tơring čar Dak Lak sem lăng, pơsir hĭ khut khăt hơdôm bruă tui tơlơi glăm ba. Laih dong, lăi pơtong kiăng tŏ tui tơlơi dưi, tơlơi gal, tơring čar Dak Lak kiăng ječ ameč pơgiong bruă dưm dăp man pơdong gưl să, phương, ngă gêh gal pok pơhai hơdôm bruă jao pơđĭ kyar bơwih ƀong huă-mơnuih mơnam.