Nao jơnum hrŏm hăng đĭ pơhiăp git gai, ơi Trần Thanh Mẫn Khua anom bruă pơ ala mơnuih ƀôn sang dêh čar pơtă pơtăn, Khul pơ ala mơnuih ƀôn sang ƀôn prong Hà Nội ăt khom pơtrut kơtang pran jua mă bruă pơblih phrâo, khom jing hơbô̆ bruă ba gru hlâo mơ̆ng Khul pơ ala mơnuih ƀôn sang djop tơring  čar, ƀôn prong amăng dêh čar. Pơblih phrâo tơlơi pơmin amăng bruă mă čih pơkra tơlơi phiăn, pơđĭ tui boh tŭ yua amăng bruă mă, sem lăng, pơsit hơdôm bruă mă yom amăng tơlơi dưi jao ngă bruă. 

Khua git gai pơ ala mơnuih ƀôn sang dêh čar lăi lĕ, jơnum lok tal anai mơ̆ng khul pơ ala mơnuih ƀôn sang ƀôn prong  amra pơjing pran kơtang pơblih phrâo, kiăo tui tơlơi kiăng pơblih phrâo, pơjing anŏ pơblih kơtang, kiăo tui hmao kru rơnuk phrâo, pơsir hĭ anun gun, pok jơlan brơi abih bang mă bruă, pơtum pơđĭ kyar bơwih ƀong huă mơnuih mơnam, pơhlôm rơnuk rơnua lŏn ia, hơđong amăng kual plơi pla hăng pơđĭ tui tơlơi hơdip mơda kơ mơnuih ƀôn sang plơi prong jưh jom, djru hrŏm tŭ yua hloh amăng tơlơi pơblih phrâo, pơđĭ kyar kơtang kơ dêh čar amăng rơnuk phrâo. Tui hăng anun, Hà Nội, kiăng đing nao pơtô hrăm mơnuih mă bruă, man pơdong hiam atur jơlan glông, sang bruă tui hăng hơdră rơgơi kơhnâo hăng phrâo hloh, hơmâo tơlơi lir hơbit prong, wai lăng, pơkă hơnơ̆ng man pơdong djơ̆ lăp, pok pơhai gêh găl kơ bruă bơwih ƀong huă, mơnuih mơnam...