VOV4.Jarai - Tlam lơ 25/1, ƀơi ƀôn prong Hồ Chí Minh, Khua git gai pơ ala mơnuih ƀon sang dêh čar ơi Vương Đình Huệ hăng grup hyu mă bruă hơmâo nao čuă, pơpŭ thun phrâo kơ ƀing djru hơkrŭ, sang anŏ kơnuk kơna čem rông ba, ƀing mơnuih djru pơgang klin Cvod-19; nao čuă, pơpŭ thun phrâo hăng ƀơk gơnam Tết brơi ƀing apăn bruă, mơnuih mă bruă hăng ƀing čơđai drit druai arăng glăk čem rông ba hăng glăk pơjrao tơlơi ruă ƀơi hơdôm Sang ai jrao pơjrao brơi ƀing čơđai drơi jăn ƀu klă.

Khua git gai pơ ala mơnuih ƀon sang dêh čar pơdah pran hok mơ-ak lơ̆m ƀôn prong mă anăn Wa Hô dưi pơwŏt glăi tơlơi hơdip tui hơđăp, tŏ tui na nao hơdôm bruă kơđi čar, bơwih ƀong huă, mơnuih mơnam. Truh ră anai, mrô mơnuih F0 ruă kraih, djai yua ƀă klin Covid-19 rĭm hrơi glăk hrŏ trun , mah hơmâo găn rơgao lu tơlơi lông, samơ̆ hăng gru grua sông kơtang, pran khăp pap ƀu brơi hlơi ôh dŏ glăi pơ tlôn, ƀôn prong ăt bơwih brơi klă kơ mơnuih ƀon sang  kiăng kơ rĭm čô mơnuih, rĭm boh sang anŏ lêng kơ čơkă thun phrâo mơ-ak mơ-ai.

Siu Đoan: Pơblang