Ƀrô tal hơdor glăi 95 thun hrơi akŏ pơjing Khul pơlir hơbit mơnuih mă bruă Việt Nam, mơguah tom brơi (28/7), ƀơi Cung Việt Xô, ƀôn prong Hà Nội, Khul pơlir hơbit mơnuih mă bruă Việt Nam pơphun jao pri Nguyễn Văn Linh tal 4; pơpŭ bơni kơ Khua khul mơnuih mă bruă mut phung ƀơi hơdôm anih anom ba gru amăng đơ đam dêh čar tal 5 hăng čơkă mă miđai mă bruă mrô I mơng Khua mir sir jao brơi Khul pơlir hơbit mơnuih mă bruă Việt Nam. Khua git gai pơ ala mơnuih ƀôn sang dêh čar ơi Trần Thanh Mẫn nao jao pri hăng đĭ pơhiăp. Pơ ala brơi khua mua Ping gah, kơnuk kơna, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm hơdôm boh than dưi ngă mơng khul mơnuih mă bruă mut phung, ƀing ding kơna, mơnuih mă bruă đơ đam dêh čar hơmâo lu tơlơi dưi amăng 95 thun rơgao; pơpŭ bơni 10 čô mơnuih apăn bruă hơmâo jao pri Nguyễn Văn Linh hăng 95 čô Khua khul mơnuih mă bruă mut phung mơng hơdôm anih anom ba gru, rơgơi bruă hơmâo jao pri.

Khua git gai pơ ala mơnuih ƀôn sang dêh čar ơi Trần Thanh Mẫn rơkâo, khul mơnuih mă bruă mut phung amra tŏ tui pok pơhai tŭ yua tơlơi pơtrun mơng Jơnum Ping gah đơ đam dêh čar tal 13; tơlơi pơtrun mrô 02 mơng Ding jum kơđi čar kơ pơplih phrâo amăng pơphun hăng bruă mă mơng khul mơnuih mă bruă mut phung Việt Nam amăng rơnuk phrâo hăng hơdôm tơlơi črâo trun mơng Ping gah, hơdră bruă, tơlơi phiăn mơng Kơnuk kơna kơ bruă pơphun, bruă mă mơng khul mơnuih mă bruă mut phung.