VOV4.Jarai - Tŏ tui bruă mă ƀơi hơdôm boh tơring čar Dơnung Tong Krah, tlam lơ 26/7, Khua git gai pơ ala mơnuih ƀon sang ơi Vương Đình Huệ hăng ƀing khua hơmâo ngă bruă hăng Khul khua apăn bruă git gai Ping gah tơring čar Quảng Ngãi. Tui hăng tơlơi lăi pơthâo mơng khua mua tơring čar Quảng Ngãi, rơnoh đĭ kyar GRDP thun 2021 hơmâo 6,05%; 6 blan akŏ thun hơmâo 6,34%. Bruă măi mok jing bruă pơtrut đĭ kyar bơwih ƀong huă mơng tơring čar; tuai hyu ngui, bơwih brơi hơmâo lu tơlơi pơplih klă; prăk pơhrui đĭ tui mơn, rơgao 51,1% hơnong pơkă mơng Kơnuk kơna jao; 6 blan akŏ thun him lăng hơmâo giăm 17.000 klai prăk.

Khua git gai pơ ala mơnuih ƀon sang ơi Vương Đình Huệ ngă bruă hăng Khul khua git gai Ping gah Quảng Ngãi.

Tŭ ư hăng hơdră ngă bruă mơng tơring čar amăng hrơi blan pơ anăp, ơi Vương Đình Huệ kiăng tơring čar Quảng Ngãi pơplih phrâo dong, gir ngă truh kih djŏp bruă kơđi čar; pơƀut ngă hơdôm kơčăo bruă prong, mă yua tơlơi gêh gal, tơlơi hơmâo mơng tơring čar pioh đĭ kyar; djă bong na nao pran jua hrưn đĭ jing tơring čar đĭ kyar tui tơlơi čang rơmang mơng Khua dêh čar hơđăp rơgŏm ơi Phạm Văn Đồng, kiăng Quảng Ngãi jing sa amăng hơdôm boh tơring đĭ kyar prong mơng kual Tong Krah.

Siu H’Mai: Pơblang