Ơi Trần Thanh Mẫn lăi pơtong, Việt Nam lăng kơ dêh čar Mi jing bơnah ngă hrŏm yôm, hăng hok mơak dêh čar Mi ăt ƀuăn djru Việt Nam hăng dong yua sa boh dêh čar rơngai, hơmâo pran kơtang hrưn đĭ pô laih anun pơdrong tui. Thun blan rơgao, lu bruă mă pơbưp nao rai hăng pơčrong sai bruă mă djop tơhnal pơkă, djop plang tơlơi pơhing pơtruh nao rai hăng djop gưl.

Pơ anăp anai dơ̆ng, Khua git gai pơ ala mơnuih ƀôn sang dêh čar ơi Trần Thanh Mẫn rơkâo dua bơnah pok pơhai tŭ yua hloh Tơlơi pôr hrŏm hăng akŏ bruă či ngă plah wah Việt Nam hăng Mi kiăng anăp nao hơdor glăi 30 thun akŏ pơjing bruă pơtom hiăp dua bơnah dêh čar thun 2025. Khua mua pơ ala mơnuih ƀôn sang dêh čar dua bơnah kiăng kơtưn pơblih khua mua pơtom hiăp bưp nao rai re se djop gưl. Khua git gai pơ ala mơnuih ƀôn sang dêh čar ta rơkâo gah dêh čar Mi sem glăi hăng pơsit brơi Tơlơi pơtrun bơwih ƀong huă anih anom sĭ mơdrô mơ̆ng Việt Nam; tañ ba anăn Việt Nam tơbiă mơ̆ng hră anăn hơdôm dêh čar hơdư̆ hĭ bruă sĭ mơdrô gơnam pơkra ming ba yua boh thâo ia rơgơi phrâo.