Amăng hơdôm hrơi nao čuă sit nik dêh čar Lao hăng nao jơnum Jơnum AIPA-45, mơguah lơ 18/10, ƀơi plơi prong jưh jom Vientaine, Khua git gai pơ ala mơnuih ƀôn sang dêh čar ơi Trần Thanh Mẫn hơmâo mông bưp Khua git gai Ping gah Mơnuih ƀôn sang ngă hơkrŭ dêh čar Lao, Khua mir sir ơi Thongloun Sisoulith. 

Dua čô khua lăng yôm bruă pơđĭ kyar hiam klă, hơđong kjăp amăng tơlơi rô nao rai giang mah hing ang, gum pơgôp yôm phăn hăng ngă hrŏm djop mơta kơplah wah Việt Nam-Lao amăng hơdôm thun rơgao, amăng anun hơmâo tơlơi gum pơgôp prong mơng Ƀirô khua pơ ala mơnuih ƀôn sang dêh čar dua bơnah; lăi pơtong, pơ anăp anai, dua bơnah kiăng ngă tui gru grua ngă hrŏm pơlir hơbit, đăo gơnang, gum hrŏm pok pơhai klă hơdôm tơlơi pơkôl mơng khua mua, amăng anun hơmâo boh than ba glăi amăng mông pơbưp dua Ding jum kơđi čar blan 9/2024 rơgao; tŏ tui kơtưn ngă hrŏm kơplah wah dua anom bruă čih pơkra tơlơi phiăn dua bơnah, ngă hrŏm kjăp, dong yua tơdruă amăng hơdôm mông jơnum khua pơ ala mơnuih ƀôn sang hăng jar kmar anun lĕ IPU, AIPA, APPF; gum hrŏm kjăp amăng hơdôm mông jơnum amăng kual hăng jar kmar.