Amăng mông mă bruă, Khua git gai pơ ala mơnuih ƀôn sang dêh čar ơi Trần Thanh Mẫn lăng yôm hơdôm boh than dưi ngă, tơlơi pơgôp prong prin mơng ling tơhan đơ đam dêh čar, amăng anun hơmâo tơhan Quân khu 3 pơgôp hrŏm hăng tơlơi dưi hrŏm lŏn ia ta; ling tơhan Quân khu 3 hơmâo ngă klă bruă pơjing, wai pơgang rơhuông adai, kual ia rơsĭ dêh čar, ba glăi tơlơi hơdip rơnuk rơnua kơ mơnuih ƀôn sang.

Kơ bruă jao pơ anăp, Khua git gai pơ ala mơnuih ƀôn sang dêh čar ơi Trần Thanh Mẫn rơkâo Quân khu 3 tŏ tui pok pơhai klă ƀiă dong tơlơi pơtrun mơng Jơnum Ping gah đơ đam dêh čar tal 13, pok pơhai klă tơlơi pơtrun mơng Ping gah ling tơhan kah hăng bruă jao gah ling tơhan amăng thun 2024. Khua git gai pơ ala mơnuih ƀôn sang dêh čar lăi pơtong, hăng pran jua “Ling tơhan hăng mơnuih ƀôn sang kar akan hăng ia”, hrŏm hăng tơhan kông ang, ling tơhan lĕ sa amăng hơdôm anom bruă ba jơlan hlâo amăng bruă djru mơnuih ƀôn sang pơhlôm hlâo hăng rŭ pơdong glăi anŏ răm rai mơng hơjan kơthel, mah glêh glar hiưm pătơhrơi kah hăng mlăm ăt abih pran jua.