Khul ling tơhan Quân khu 9 pơdong amăng 12 boh tơring čar, ƀôn prong amăng kual lŏn dăo ia krông Cửu Long, anai lĕ kual yôm phăn. Amăng rơnuk blah wang pơklaih rơngai lŏn ia, ling tơhan hăng mơnuih ƀôn sang mơng Quân khu 9 hơmâo pơgôp prong prin amăng tơlơi dưi pơklaih rơngai lŏn ia. Đĭ pơhiăp amăng mông mă bruă, Khua git gai pơ ala mơnuih ƀôn sang dêh čar ơi Trần Thanh Mẫn pơtă pơtăn, Quân khu 9 kiăng gơgrong mut hrŏm djru mơnuih ƀôn sang pơklaih mơng rin rơpa, pơhrŏ trun ƀun rin, man pơdong plơi pla phrâo, pơđĭ kyar gru grua-mơnuih mơnam; pơgang, pơgăn, rŭ pơdong anih răm rai mơng hơjan kơthel, ia ling dăo, klin kheng, ĕp hăng djru brơi mơnuih bưp truh sat.

Gum hrŏm hăng tơhan kông ang, tơhan wai pơgang guai, hơdôm anih anom mơng Ding jum bơdjơ̆ nao hăng gong gai ƀon lan, gir run pơgang, pơgăn ƀing ngă soh, pơjing kual plơi pla hơđong pơlir hơbit hăng anom bruă rơnuk rơnua; gơgrong kơdong glăi ƀing mơnuih pơčut pơčao kiăng ngă rung răng amăng ƀon lan. Khua git gai pơ ala mơnuih ƀôn sang dêh čar rơkâo, Quân khu 9 đing nao pơhlôm brơi klă tơlơi hơdip mơda brơi ƀing apăn bruă, ling tơhan. Ngă tui klă hơdră djru, djru tui tlôn ƀing ling tơhan.