Đĭ pơhiăp amăng mông ngă lơphet, Khua git gai pơ ala mơnuih ƀôn sang dêh čar pơdah pran ol kơdol hơdor kơ Khua git gai Ping gah dêh čar ơi Lê Duẩn-Khua apăn akŏ kơhnâo kơhnăk, mơnuih tŏ tui rơgơi hloh amăng bruă ngă hơkrŭ mơng Khua mir sir Hồ Chí Minh. Laih dong lăi pơtong, ơi Lê Duẩn ƀu djơ̆ kơnong lĕ khua apăn akŏ kơđi čar-ling tơhan rơgơi hloh đôč ôh mơ̆ ăt lĕ mơnuih hơmâo tơlơi pơmĭn prong, rơgơi pơčeh phrâo, pơgôp amăng bruă ngă hơkrŭ mơng Việt Nam.

Amăng hrơi mông yôm phăn, pơ-ư ang lơm đơ đam dêh čar anăp nao tal hơdor glăi 50 thun hrơi pơklaih rơngai kual Dơnung, pơlir lŏn ia, Khua git gai pơ ala mơnuih ƀôn sang dêh čar ơi Trần Thanh Mẫn hăng grup hyu mă bruă hơmâo nao tŭi ñang pioh hơdor kơ ƀing tơhan djai pơsăn drơi ƀơi plơi prong sô hơđăp Quảng Trị. Tŏ tui, grup nao čuă sang anŏ tui hơdjă djru ƀơi să Hải Thượng, tơring glông Hải Lăng.